٦ أسباب هتقولك ليه الكلاب مهمة لصحتك النفسية

23/03/2021

النهاردة هو يوم الكلاب الصغيرة، أو الجراء أو الـ Puppies، كائنات جميلة وعاملين زي الأطفال الصغيرين في نفسهم ولما بيكونوا موجودين في أي مكان "حتى لو شخص مش بيحب الكلاب عموما" هيلاقي نفسه بيلعب معاهم وهما كمان بيحبوا اللعب وبيعرفوا إن الشخص اللي ده بيحبهم وعايز يلعب معاهم!

الكلاب هي أفضل صديق للإنسان، ولكن هل بيكون ليهم تأثير إيجابي على الصحة النفسية؟ أيوة، حسب موقع chicagotribune، عدد من الدراسات على مر السنين أظهرت إن الكلاب والحيوانات الأليفة عموما ليها تأثير إيجابي على الصحة العقلية للإنسان بس إزاي؟ هقولكم

الوحدة: أسوأ شعور ممكن يحسه الإنسان وكمان بتضر الصحة النفسية بشكل كبير، وجود كلب في حياتك وعاملك جو في البيت زي إنكم تلعبوا مع بعض، تشوفوا التلفزيون، تقعد تتكلم معاه حتى لو مش هيرد عليك "بس أعتقد هيحس بيك" كل ده ممكن يقلل من الاحساس بالوحدة.

التقليل من هرمونات التوتر: حسب دراسة في جامعة واشنطن بتقول إن بعد مداعبة الحيوانات الأليفة "كلاب أو قطط" لمدة 10 دقايق بس، ده بيقلل من مستويات هرمون الإجهاد "الكورتيزول" في مجرى الدم أو هرمونات التوتر اللي بتسبب مشاكل نفسية، تخيل مجرد إنك لاعبت كلب لمدة قصيرة ممكن يعمل إيه!

مفيش هدف في الحياة: ده اللي بيشعر بيه الشخص اللي عنده اكتئاب، ولكن لما تمتلك كلب أو حيوان أليف ده بيقلب شعور الشخص المكتئب للعكس تماما، لإن الكلب بيحتاج يأكل وينزل يتمشى وياخد علاجه في مواعيده ويقضي وقت مع صاحبه "واللي بالمناسبة بتكون أهم لحظات في يوم الكلب".
دراسة عملتها المكتبة الوطنية للطب جابوا أشخاص وإدوهم حيوانات أليفة عشان يعتنوا بيهم، وبعد فترة الأشخاص دول بلغوهم إن مستويات الاكتئاب انخفضت عندهم.

الكلاب بتخرجك أكتر: الإنسان لما بيكون في حالة مزاجية أو نفسية مش أفضل حاجة، بيكون القعاد في البيت هو الحل، ولكن مع وجود كلب، الوضع بيختلف لإنه بيحتاج ينزل يتمشى كل يوم تقريبا، وعشان قعدة البيت مش ألطف حاجة في الأوقات دي، فا الخروج مع الكلب للتمشية ممكن يساعد في تحسن بسيط في النفسية.

التمرين: النقطة دي مرتبطة بالنقطة السابقة نوعا ما، وفقا لموقع "مايو كلينك" ممارسة الرياضة لمدة 3 دقيقة من 3 لـ 5 مرات في الأسبوع بيقلل الاكتئاب والقلق، والمشي مع كلبك يعتبر بمثابة تمرين، والكلب بتحتاج تتمشى أكتر من 30 دقيقة كل يوم على مدار الأسبوع، فا كل ده مع بعض هيساعد بشكل كبير في تحسين الصحة النفسية.

الكلاب بتخليك اجتماعي: بعيدا عن المشي والرياضة، التمشية معاهم بتفتحلك باب التعرف على ناس جديدة، ودي بتحصل دايما ما بين ملاك الكلب اللي بتنتهي بتكوين صداقات مع ناس من منطقتك.

أعتقد بعد كل ده لازم تبدأ تفكر خطوة الجاية، وهي إنك تمتلك كلب!

Comments: