اعرف 8 أنواع من الكذابين

31/03/2021

الكذب منتشر حوالينا طول الوقت، وبنشوفه في كل حتة بنروحها غالبا، بس الأنواع بتختلف، في اللي بيكذب عشان بيحب الكذب، وفي اللي له هدف من ورا كذبه، وفي اللي بيكسل فا بيكدب.

موقع mindremakeproject بيعرفنا 8 أنواع للكذابين:

الكذاب المريض
ده نوع من الناس بيكدب باستمرار، لأي سبب وبدون سبب، وبيتم اعتبارهم إنهم أشخاص "مختلين اجتماعيا"، والكذب المتكرر والمستمر بيكون معيار لتشخيص "اضطراب الشخصية المعادية للمجتمع" ولكن في نفس الوقت هو مش شخص خطر ولكن مينفعش تثق فيه أو يكون حد قريب منك أو صديق أو شريك حياة.

أنا راجل لعين وبحب الكذب
وده بيكذب عشان هو بيحب يكذب وبيستمتع بداه، وبيخليهم يحسوا بالقوة، والنوع ده من الكذابين بيشبه الكذاب المريض، والنوع ده بيكون خبيث، ولكن اللي بيفرقه عن أول نوع إنهم بيقدروا يسيطروا على نفسهم أحيانا.

الثعباني
النوع ده من الكذابين بيكون له هدف، يعني بيكذب عشان يحقق أو يوصل لحاجة، وأحيانا بيستخدموا أساليب زي المجاملات أو التطبيل لو عايز يترقى في الشغل.

بيكذب على سبيل الاحتياط
ده بيكذب مقدما عشان يحمي أسراره، ممكن يكون كويس وممكن يكون العكس، وده بيعتمد على إيه الأسرار اللي بيحموها، وممكن كمان يكونوا من أصدقاء ويحموا أسرارك، والنوع ده من الناس عمرك ما هتعرف حاجة عنهم وطالما متمكنين من الكذب، عمرهم ما هيكشفولك حاجة إلا بمزاجهم.

كفاياك أعذار  
دول عشان يريحوا دماغهم بيكدبوا، يعني يهربوا من عزومة عائلية بالكذب، أو اللي يروح الشغل متأخر فا يقول ده كوبري أكتوبر كان واقف.

الكداب الجامد جدا
هما بيكدبوا عشان يعجبوا الناس، وممكن ميبقاش مدرك إنه كذاب، يعني لو بيحكي موقف بيحور فيه ويبين نفسه إنه كان قد إيه هو جامد، والنوع ده مش خطر أوي بس كذبهم وتحويرهم وأفورتهم بتكون مستفزة خصوصا لو الكذب باين لأي شخص والناس كلها متفقة على كذبه.

الطاقة يا دوبك!
الكداب الكسلان ده واحد بيكسل يحكي تفاصيل موضوع أو يفسره أو يشرحه، يعني لو موضوع يتحكي في 5 دقائق هو ممكن يحكي في نص دقيقة، لإنه مش بيحكي القصة كاملة، أو بيشوف التفاصيل غير مهمة بالنسبة له بس هي في الحقيقة مهمة.

اللي جاي أحلى
ده نوع من الكذابين الطيبين، يعني بيحبوا يطمنوا اللي حواليهم إن كله هيبقى تمام وزي الفل والحياة زبادي خلاط حتى لو الدنيا سودة قدام وشهم، يعني هما في النهاية نواياهم كويسة بس مش صريحين.

Comments: