كل اللي عايز تعرفه عن مدينة الدواء المصرية اللي تم افتتاحها 

01/04/2021

الخميس 1 أبريل 2021 افتتح الرئيس عبد الفتاح السيسي مدينة الدواء  في منطقة الخانكة وكان هدفها هو زيادة التعاون بين الدولة والقطاع الخاص عشان يتم تحويل مصر لمركز إقليمي لصناعة الدواء في الشرق الأوسط، وتعتبر مدينة الدواء واحدة من أهم المشاريع القومية لتنفيذ امتلاك القدرة التكنولوجية والصناعة الحديثة في مجال تصنيع الدواء.

وبعد افتتاحها خلينا نقولك إيه هي أهداف مدينة الدواء:

1-  هي واحدة من أكبر المدن الدوائية في الشرق الأوسط، وهيتم استخدام أحدث التقنيات والماكينات فيها.

2- العمل على مشكلة نقص الأدوية ومواجهتها والسعي ورا تصدير الأدوية بنسبة ربع إنتاجها.

3- المدينة هتبقى مجهزة بكاميرات عشان يتم التعرف على الأدوية غير المطابقة للمواصفات عشان يتم تحقيق هدف أعلى جودة للأدوية.

4- المدينة بتعتمد على أعمال التضيف الإلكتروني الذاتي وده بيساعد على استمرار الإنتاج في المصانع.

5- المدينة بتضم مركز إقليمي لتصنيع الأدوية بالتعاون مع شركات أجنبية ودي اللي بتمهد للتصدير لدول أفريقيا.

6- المرحلة التانية من المدينة هتهتم بالدخول في صناعة الأدوية المتخصصة زي صناعة أدوية السرطان عشان يتم طرحها بسعر مناسب للمواطن المصري.

7- هيتم صناعة أدوية متعلقة بفيروس كورونا والأولوية لأدوية مناسبة لأصحاب الأمراض المزمنة زي الضغط والقلب والكلى والمخ والأعصاب.

8- مساحة مدينة الدواء 180 ألف متر بطاقة إنتاجية 150 مليون عبوة في السنة.

9- مدينة الدواء بتضم مصنعين منهم مصنع للأدوية غير العقيمة  واللي بيضم 18 خط إنتاج وده بيوفر احتياجات الدولة من الأدوية. 

10- ماكينات المصانع في المدينة بتشتغل بشكل إلكتروني بالكامل وفي حال إن أي دخل إيده في أي ماكينة أو فتحها بتتوقف عملية التصنيع، ودور الكوادر البشرية مقتصر على وضع البيانات لتشغيل الماكينات الحديثة.

11-  وطبعا من أهم أهدافها توفير دواء آمن وفعال للمواطن المصري.


 

Comments: