ملخص قصة خطف ومحاولة اغتصاب وقتل الطفلة "ريماس"!

07/04/2021

بعد ما قررت نيابة دكرنس بمحافظة الدقهلية، الأربعاء، حبس المتهم بخطف وقتل الطفلة "ريماس محمد جلال عبدالرازق" واللي عندها 8 سنين، واللي سببت قضيتها حالة من الغضب عند ناس كتير
والجريمة حصلت يوم الثلاثاء 6 أبريل في مدينة دكرنس في محافظة الدقهلية، بعد خروج ريماس من بيتها الساعة 8 الصبح عشان تشتري عيش من مخبز قريب من البيت ومرجعتش، وبدأ أهلها يدوروا عليها طول اليوم، لحد ما طفلة قالت لجدها إنها شافت ريماس ماشية مع راجل ودخلوا عمارة ودلت الطفلة أهل ريماس على العمارة، ولما دخلوا لقوا جثة ريماس  في المدخل وكانت متوفية.

سكان العمارة كلهم خرجوا عشان يشوفوا إيه بيحصل ما عدا شقة واحدة فضلت مقفولة، واللي هي شقة المتهم "عبد العظيم" واللي كان مطابق لوصف الطفلة اللي دلتهم على العمارة وكمان وصف الجيران، والأهالي قدروا يقتحموا شقته وكان لبسه ملطخ بدم ريماس ، ومعاه سلاح الجريمة اللي هو السكينة اللي ضربها بيها 3 مرات لحد ما ماتت. 

وهجم الأهالي عليه، قبل تدخل قوات الأمن وتحفظها عليه وتحويله للنيابة

وكشف التقرير المبدئي للطبيب الشرعي عقب تشريح جثة ريماس ، أنها تعرضت لمحاولة اغتصاب، وعند فشل المتهم في اغتصابها بعد مقاومة الطفلة له وصراخها  خاف من الفضيحة  وضربها  3 طعنات وده أدى إلى وفاتها.

واعترف المتهم بالجريمة وقال إنه شاف الطفلة خارجة من المخبز واستدرجها لعمارته وقالها إن والدتها مستنياها هناك، وأول ما دخلت حاول الاعتداء عليها وعند صراخها قتلها.

وتم دفن الطفلة صباح اليوم "الأربعاء".. وفي انتظار الحكم على المتهم.
 

Comments: