مين هي داليا التوني صاحبة جملة التريند "عندكوا شامبو؟"

08/04/2021

آخر فترة انتشر على السوشيال ميديا مقطع من فيلم الالماني بتقول فيه بنت "عندكوا شااامبو؟ أومال عندكوا إيه دباديب؟" وبقى تريند وبيتم استخدامه في فيديوهات كتير واتعمل عليه ميمز وكوميكس ومن أشهر الإفيهات حالياً.

الجملة اتقالت في فيلم الالماني لمحمد رمضان اللي تم عرضه في سنة 2012 ووقتها الجملة عدت على ناس كتير ومحدش خد باله منها لكن بعد حوالى 9 سنين من الفيلم الناس خدت بالها منها وخصوصا على السوشيال ميديا والموضوع خلى أغلب الناس تتكلم على الممثلة صاحبة الجملة.

وصاحبة الجملة هي ممثلة شابة اسمها "داليا التوني" واللي كانت مفاجأة لناس كتير إنها توفت من حوالي 3 سنين في حادثة عربية على طريق مصر السويس عن عمر يناهز الـ 26 سنة وكان أول ظهور ليها في مسلسل الكبير أوي في 2011 مع الفنان أحمد مكي.

وتاني عمل لها كان فيلم الالماني مع محمد رمضان في 2012 وكانت تعتبر أول بطولة لها، وظهرت برضه سنة 2012 في فيلم "فركش" وفيلم "غش الزوجية" وفيلم "يمين طلاق"

و شاركت حمادة هلال في فيلم حماتي بتحبني" في سنة 2014، وشاركت في مسلسل "العملية ميسي" اللي كان بطولة أحمد حلمي وبشرى في سنة 2014، وظهرت في مسلسل "دكتور أمراض نسا" مع مصطفى شعبان سنة 2014، ده غير كمان إنها شاركت في ‏مسلسل مولانا العاشق مع مصطفى شعبان سنة 2015، وشاركت في ‏مسلسل ظرف أسود مع عمرو يوسف وصلاح عبد الله سنة 2015.

وأغلب الناس اللي عرفوا على السوشيال ميديا إنها توفيت من فترة اتصدموا ودعوا لها بالرحمة وبعضهم قال إن الفيديو ممكن يبقى انتشر عشان هي شخص كان يستاهل الناس تفتكره وتترحم عليه. 
 

Comments: