إزاي تدخل علاقة سعيدة طويلة المدى من غير آيس كريم 

14/04/2021

بعد ما الفنانة ملك قورة لطخت تي شيرت الفنان أحمد داش بالأيس كريم بتاعها وبقيت العلاقة في أقل من ساعتين "ريليشنشيب جولز" لعدد كبير من الناس على السوشيال ميديا وبقى نفسهم يعيشوا علاقة شبه دي من اللي بتكمل العمر كله، وأغلبهم شاف إن السر في الآيس كريم خلينا بقى نصدمك بالحقيقة المُرة ونقولك إن برضه الحل السحري فينا مش في الآيس كريم عشان العلاقات تكمل.

موقع "psychologytoday" قال في واحد من مقالاته إزاي تبدأ علاقة قوية وتستمر لمدة طويلة في خطوات معينة.. الخطوات دي هي:

1- خليك صريح:

المشاكل اللي بتتجنبها أو الحقايق اللي مش راضي تعترف بيها ممكن تبقى دي الحاجات اللي تقضي على العلاقة فمن الأحسن إنك تواجه المشاكل دي بشكل مباشر وتعالجها من أول ما تعرفها بدل ما تتراكم وتخرب العلاقة في المستقبل، عشان كده فكر في العلاقة من كل الجوانب العاطفية والمادية واللي بالعقل واتكلم مع شريكك فيها بكل صراحة.

2- أقبل الاختلاف بينك وبين شريكك: 

من أكبر المشاكل في العلاقات إنك بتفترض إن الطرف التاني زيك بالظبط في مشاعره وأفكاره، أو بمعني تاني إن الجزء العاطفي مننا بيبقى رافض فكرة إن الطرف التاني مختلف عننا في الواقع، وأحياناً بيبقى مختلف خالص
 

3- قول اللي إنت عايزه:

خليك منفتح في أفكارك ومشاعرك بس من غير ما تتوقع إنهم ينفذوا اللي أنت عايزه بالظبط بمعني إنك لو عايز شريكك يحضنك فحلو جدا إنك تقوله يحضنك بس من غير ما تتوقع إنه يسمع الكلام، لإن مسؤوليتك هي إنك تقوله رغباتك واحتياجاتك وهو حر في تصرفه بناءاً على رغبته هو كمان.
 

4- شيل الحواجز في التواصل:

عشان تبقى بتتواصل بطريقة صادقة أكتر لازم تشيل حواجز التواصل وتكشف تفضيلاتك في التواصل وشريكك كمان يعمل كده وتوصلوا لمنطقة في النص مناسبة ليكوا أنتوا الاتنين.
 

5- خلي بينكوا تناغم عاطفي:

لاحظ شريكك أغلب الوقت من تصرفاته مش لازم من الكلام اللي بيقوله بس حاول تلاحظ هو مبسوط ولا زعلان ولا متوتر ولا حزين ومحبط ولا خايف، وانتبه لنبرة صوته وكلامه ولغة الجسد وده هيوصل العلاقة لمرحلة من التناغم العاطفي اللي بيرفع مستوى الطرفين في فهم الطرف التاني وبالتالي العلاقة بتستمر لفترة أطول بشكل أحسن.
 

6- اتكلموا عن علاقتكم كل فترة:

زي اجتماعات الشغل كده حاول يكون عندكوا اجتماع كل فترة تتكلموا عن العلاقة فين ووصلت فين وإيه اللي ممكن يتحسن.
 

7- خليكوا واثقين في بعض:

كل الخطوات اللي فوق دي هتساعدكم تبنوا الثقة في بعض وده شئ أساسي لنجاح العلاقات، وقيم الثقة اللي في العلاقة دي بينك وبين نفسك، وثقتك برضه في شريكك.
 

8- احترم الحدود والخصوصية في العلاقة:

مع التطورات التكنولوجية اللي بقيت في حياتنا بقى سهل أوي كل شخص يتتبع الطرف التاني في العلاقة أو حتى يبقى بيتكلم معاه طول النهار، بس لما تسمح للطرف التاني بشوية خصوصية وتبطل تخليه يعمل حاجات مش عايز يعملها ده بيساعد على زيادة السعادة في العلاقات وبيبني الثقة المتبادلة.
 

9- ماتحاربش التغيير والتنوع:

الناس بتتغير والعلاقات كمان بتتغير، وده مش شئ سئ ولا حزين دي حقيقة لازم تعترف بيها لإن في بعض الأوقات العلاقات اللي بتكون ثابتة على نفس الرتم بتفقد رونقها عشان كده مهم إن الطرفين يسيبوا مساحة لبعض، وكل طرف يحقق نفسه وأهدافه.
 

10- حققوا أهدافكم الخاصة بنفسكوا:

خليك فاكر إنك على علاقة بنفسك برضه قبل الطرف التاني عشان كده حقق أهدافك في الأول في أي علاقة وماتخليش رغبات واحتياجات الطرف التاني تطغى على رغباتك وزي ما قولنا في الأول خليك صريح وافتح قلبك للطرف التاني وقوله رغباتك واحتياجاتك وده هيساعدكم تبنوا علاقة طويلة المدى مع بعض.

Comments: