تامر محسن ومحمد فراج.. دويتو المتعة السهل الممتنع!

21/04/2021

مع تألق محمد فراج في مسلسل "لعبة نيوتن"، ناس كتير اتكلمت عن التفاهم بينه وبين المخرج "تامر محسن"، والتألق اللي بيحققوا الاتنين في شغلهم مع بعض، لقينا إن الموضوع ده مش من دلوقتي، والدويتو ده بدأ من بدري، وبالتحديد سنة 2013

قبل الفترة دي كان محمد فراج بدأ مشواره في التمثيل وقدر ينور في أكتر من عمل زي " المصلحة، طرف تالت" وغيرهم، لكن مكانتش جاتله الفرصة اللي يقدر فيها يظهر فيها جزء كبير من موهبته لحد ما اجتمع مع تامر محسن في مسلسل "بدون ذكر اسماء" سنة 2013 من تأليف الكاتب الراحل "وحيد حامد"

قبل المسلسل ده، تامر محسن كان أخرج بعض الأفلام القصيرة والوثائقية وإعلانات تلفزيونية، ودي كانت بدايته مع الدراما
واللي شفنا فيها "فراج" بشكل أول مرة نشوفه فيه في شخصية "رجب الفرخ" المتربي في الشارع بسبب مأساة حصلتله وهو صغير
ومراحل تطور حياته وعلاقاته باللي حواليه، ولقطة جوازه من الست "أصيلة" أو "النعجة" عشان تخليه يورثها وتضمن له حقوقه، لحد نهايته اللي  كانت درامية زي حياته بالظبط

وده مشهد من المسلسل
 

سنة 2015 كانت سنة الانطلاق والتألق لدويتو "تامر محسن ومحمد فراج" من خلال فيلم "قط وفار" من تأليف "وحيد حامد" ومن بطولة محمود حميدة، واللي قدم فيه  "فراج" شخصية مختلفة تماما عن كل اللي قدمه قبل كده شخصية "حمادة" الشاب الغلبان اللي بيلاقي نفسه في مواجهة مع وزير الداخلية اللي هو قريب والدته، في نفس السنة قدم تامر وفراج المسلسل اللي ناس كتير بيعتبروه العمل اللي حقق نجاح كبير ونجومية لتامر وفراج ولكل اللي شاركوا فيه وهو مسلسل "تحت السيطرة"، واللي قدم فيه فراج شخصية " علي" المدمن
بكل مراحلها وتحولاتها، وطلع بيها من الصورة الكليشيه اللي عند الناس عن المدمنين وطريقة كلامهم وتصرفاتهم

وده مشهد من المسلسل

بعد المسلسل ده فراج شارك في أعمال كتير ناجحة، بس محققتش نفس نجاح شخصية "علي الروبي" من مسلسل "تحت السيطرة" لحد ما اجتمع الدويتو تاني بعد سنتين في 2017 في مسلسل "هذا المساء"  وشخصية "سوني" اللي فضلنا كارهينها من أول المسلسل وصعبت علينا في آخر حلقة، سوني الهاكر اللي بيتجسس على موبايلات الستات ويبتزهم، بس في نفس الوقت هو حاسس بوحدة وعدم أمان والرفض من وهو صغير، لحد مشهد الحادثة وهو بيشوف وشه لأول مرة، وقدر فراج يعبر عن كل المشاعر دي ويوصلها بكل سلاسة
وده مشهد من المسلسل

 

ورجع الدويتو ده السنادي من خلال مسلسل "لعبة نيوتن" وشخصية "مؤنس" اللي بيقدمها فراج، المحامي المسلم اللي عايش في أمريكا وواخد الجنسية وبيتقرب من "هنا" ولسه مش عارفين ناويلها ولا ناويلنا على إيه
وده مشهد من المسلسل

إن يبقى في ممثل شاطر ده سهل، وإن يبقى مخرج شاطر سهل برضه بس مش أوي يعني، بس إنك تلاقي ممثل ومخرج بيطلعوا أحسن ما في بعض في الشغل بالطريق السهل الممتنع، ده بقى اللي مش سهل، عشان كده عايزين نحيي ونشكر دويتو "تامر محسن" و"محمد فراج" على كل الأعمال اللي فاتت واللي دلوقتي واللي جاية كمان!

Comments: