٦ أسباب تخلي يوسف وعليا علاقة "توكسيك" مش "جولز" زي ما الناس بتقول

25/04/2021

كتبت: آية زكي

من وقت بداية ظهور شخصية عليا وعلاقتها بيوسف في مسلسل الاختيار والناس كانت شايفة إنها علاقة حلوة ومستنين الخطوات اللي العلاقة دي بتاخدها، بعدين وصلوا في فترة إنهم بقوا "ريلشينشيب جولز" على السوشيال ميديا خصوصا وهما بياكلوا كبدة وسجق على عربية في الشارع.

بس فيه تفاصيل كده جوا العلاقة دي خلتنا ناخد بالنا إنها زي علاقات كتير بتبان على السوشيال ميديا بتلمعها وتبروزها بشكل جميل بسبب الصور والكابشنز والكلام الحلو بس جواها تفاصيل متعبة ومرهقة جدا، يعني برضه نقدر مانسمعش كلام السوشيال ميديا نقول على علاقة يوسف وعليا علاقة توكسيك للأسباب دي:

1- في البداية يوسف خلى عليا تستناه فترة كبيرة بحجة إنهم أخوات وهو عارف إنهم حاسين بمشاعر من ناحية بعض ومن صفات العلاقات التوكسيك إنها بتخلي طرف يستني كتير على أمل التغير وإن فيه حاجة هتتصلح حسب ما قال موقع "womens health mag"

2- يوسف ماخدش أي خطوة في علاقتهم إلا لما حس بالخطر والتهديد إنه هيخسر عليا وفي الآخر قالها مبرر إنه كان خايف وهي صدقت ومن صفات العلاقات التوكسيك إن  فيه طرف بيحاول يخلق اعذار ويبرر مواقفه عند الطرف التاني طول الوقت والطرف التاني بيخلق له أعذار وبيسامحه حسب موقع "insider"

3- يوسف عشان يكسب تعاطف عليا معاه في مرة كانوا متخصمين فيها قالها إنه خارج مأمورية وكدب عليها عشان تسامحه وتكلمه ومن ضمن علامات العلاقات التوكسيك الكدب حسب ما قال موقع "healthline" 

4- قال موقع "healthline" برضه إن من علامات العلاقات التوكسيك هي إنك تتجاهل احتياجات شريكك وده اللي عمله يوسف لما قرر يتجاهل احتياج عليا له واتصرف من دماغه عشان يبقى هو اللي مستريح ومايحسش بالذنب ناحيتها.

5- إن الشخص يحس إنه مش في أمان طول الوقت "womens health mag" وده برضه اللي كان دايما بيصدره يوسف لعليا وإنه ممكن يمشي ويسبها في أي وقت.

6- وآخر حاجة تخلي علاقة يوسف وعليا توكسيك إنهم لما بيتخانقوا مابيعملهاش ولا لايك واحدة مهما استفزته ودي حسب موقع "The Glocal" 

Comments: