القصة الكاملة لأزمة مها أحمد مع أبطال مسلسل نسل الأغراب

15/05/2021

أعلنت الشركة المتحدة للخدمات الإعلامية إنها وقفت التعامل مع المخرج محمد سامي وعلى أساسه بدأ فنانين كتير يعلقوا على الخبر ده سواء اللي كان ليهم خلافات معاه زي أنغام اللي نشرت ستوري على الأكونت الرسمى بتاعها على انستجرام وقالت فيها "اللهم لك الحمد حمدا كما ينبغي لجلال وجهك وعظيم سلطانك" ومجدي الهواري اللي كتب بوست على الأكونت الرسمي بتاعه وقال "عارفين المثل اللي بيقول: لا يصح إلا الصحيح ولا إيه؟" بس بعد كده نفى الكلام ده في كومنت وقال "الله ياجماعة مش قصدي كده خالص" ونجوم تانية كانوا شايفين إن مي عمر لسه بتشارك في أعمال وبطولات بسببه واختلفت مواقف الفنانين بين مؤيد وفرحان ومعارض لقرار شركة المتحدة. 

أما الفنانة مها أحمد كان ليها تعليق مختلف على الخبر ده وكتبت بوست طويل عندها على الفيسبوك بتشرح موقفها من نجمين وقالت على واحد فيهم إنه ندل وقالت عليهم كمان نجمين عملوا مسلسل واتنجمت عليهم بنوته لسه ألف باء تمثيل واديتهم على قفاهم" عشان تبقى بتوضح بشكل غير مباشر مين هما النجمين دول.

وقالت في البوست ده "عوضي على الله دى الجملة اللى دايما بقولها لما اتصدم فأشخاص، الحكاية يا سادة نجمين عملوا مسلسل واتنجمت عليهم بنوته لسه الف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم ان طول عمرهم مبيعملوش كده مع أي زميله لهم اقربها انا، النجم الاولانى بينى وبينه عيش وملح وزماله رشحت فمسلسل بطولته وكان بيقنعنى بدور ولما وافقت بعتولى دور تانى معرفوش دور متعملوش واحده مبتدئه المفروض انه عارف قيمتي الفنية وعارف انى اضافه له اتهرب منى وموقفش جنبى وباعنى رغم ان الكل عارف انى زى اخته (ندل)، اما التانى كان في بداياته يتمنى يسلم عليا ويقولى يااستاذه نزلت من نفسى وقلتله مش هنشتغل مع بعض ما هي الحوجه مره رد وقالى الدور بينادى صاحبه طبعا محكلكوش قد ايه ندمت نفسى وعشت اسود ايام حياتى عياط واكتئاب وقلت عوضى عليك يارب، وتمر الايام والاتنين يعلو ويتجمعوا مع بعض فمسلسل واحد( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعاية الدراما كامله لصالحها وهما (مخدماتيه للاستاذة)، يمهل ولا يهمل ابدوا من جديد يا اوفر تمثيل ياللى مبتقروش يا كمبارس جنب النجمة. نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. ( عوضنا على الله ) .يارب متحوجنا لحد حتى ولو كان اققرب الناس لينا" 

وطبعا كان باين إن الكلام على نجوم عمل مسلسل نسل الأغراب وخصوصا بعد قرار شركة المتحدة للخدمات الإعلامية بوقف التعامل مع محمد سامي، وبالتالي الموقف ماخلصش لحد هنا وردت أخت أحمد السقا "فاطمة السقا" ببوست على الفيسبوك وعملت فيه "منشن" لمها أحمد اللي كان كلامها واضح إنه على السقا وقالت لها: 

"الكلام ده موجه ليكي يا أستاذة، بدل ما تفضلي تمسحي ردي كل شوية.. ابهرتيني يا مها بأخلاقك العالية، وبأنك افتكرتى العيش والملح اللى كلتيه فى البيت بتاع الفنان اللى مش عارفة تقولى اسمه بس عرفتى تقولى عليه (ندل) اللى هو أحمد السقا.. بس أنا بقولك قدام الناس، قطع لسان أى حد يقول عليه كده لأنه راجل أكرمك ووقف جنبك أنت ومجدى بدل المرة ألف، وأمير كرارة برضه راجل جدع ومحترم للى مايعرفهوش فى البوست بتاعك ده.. معرفش إيه الفرص اللى كانت عندك اللى كان يتمنى يشتغل معاكى فيها زمان، بس هو أى حد يتمنى يشتغل معاه دلوقتى أكيد.. وكلمة الدور بينادي صاحبه دى بتاعة أفلام.. مابتتقالش في الحقيقة.. كفاية دراما وتشويه للناس، وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج، الحقيقة أنا مش عارفة أنتى عايزة إيه.. أنا مش شايفة بعد العشرة الطويلة اللى أنتى قولتى عليها غير كمية الحقد والسواد والشماتة اللى كانوا متداريين ورا ابتسامة كدابة، معرفش أنت إزاى كنتى بتدخلى بيوتنا الصراحة وأنت ست وحشة كده، نسيت أقولك السب والتطاول ده بيدل على الأصل.. وإحنا بقى ولاد ناس، مع أننا عندنا كلام كتير أوى يتقال" 

بس الموضوع ماخلصش لحد رد أخت أحمد السقا ده والدة السقا كمان ردت على مها أحمد في بوست على الفيسبوك وقالت لها "ع الأصل دور..كومبارس فاشلة تتطاول وتسب فنانين كبار.. وتعلق فشلها عليهم.. تبحث عن الشهرة بطريقة بذيئة..مهما حاولتي يا كومبارس ليس لك مكان بين الفنانين المحترمين .. وان طلع العيب من أهل العيب ما يبقاش عيب".

ورد أمير كرارة على بوست واحد من الصحفيين اللي كان بيتكلم فيه عن بوست مها أحمد وقال الوسط الفني كبار وصغيرين عارفين السقا وكرارة موقفهم إيه مع زمايلهم وأخواتهم الفنانين كبار وصغيرين وشكرًا"

Comments: