موضوع مايهمكش: القصة الكاملة لقرابة حورية فرغلي وأمينة خليل 

23/05/2021

حورية فرغلي كانت ضيفة حلقة امبارح السبت 22 مايو اللي اتعرضت من برنامج "واحد من الناس" اللي بيقدمه الإعلامي عمرو الليثي على قناة الحياة، وده كان أو لقاء تلفزيوني ليها بعد رجوعها من آخر عملية جراحية عملتها في أمريكا.

وقالت في الحلقة مجموعة من التصريحات اللي كان من ضمنها إنها باعت الفيلا بتاعتها عشان تقدر تسافر أمريكا وتقعد هنام 4 شهور وتعمل العملية، وقالت إنها فضلت لمدة سنتين ماتبصش في المراية لنفسها، وقالت كمان إن فيه فنانين عمرها ما اشتغلت معاهم سألوا عليها زي " شريف منير و ايمان الحصرى و اروى جودة ونبيلة عبيد" وغيرهم، ولكن على الجانب التاني لما طلبت مقابلة محمد رمضان هو رفض لإنها كانت بتصور عمل فني جنبه وكان الفاصل بينهم "كرفان" وده بالرغم من إنها وقفت جنبه في فيلمين "عبدة موتة" و"قلب الأسد" وقالت إنها مش زعلانة منه كفاية اللي هو فيه.

وقالت كمان من ضمن التصريحات دي إن الفنانة أمينة خليل تبقى بنت خالتها وإنها ماسألتش ولا مرة عليها في محنتها وإن حتى والدة أمينة خليل ماكلمتش والدتها تطمن عليها.

لكن النهاردة الأحد 23 مايو وبعد ما انتشرت عناوين كتير في بتقول إن أمينة خليل وحورية فرغلي ولاد خالة، ردت أمينة خليل على التصريحات دي وقالت إنهم مش ولاد خالة زي ما قالت بعض العناوين والمواقع، ولكن بتجمع بينهم صلة قرابة من بعيد شوية.

وقالت كمان أمينة خليل إن فيه علاقة عائلية بعيدة بتربط جدتها ووالدة حورية فرغلي وأكدت كمان على إن مافيش أي تواصل بينهم من قبل دخولها الوسط الفني أو حتى بعده، وقالت إن ماكنش فيه اختلاط بين العائلتين بأي شكل، والموضوع لا يتعدى كونه علاقة عائلية بعيدة، وبالتالي طول سنين عملها في الوسط الفني ماحدش اتكلم عن العلاقة دي من قريب ولا من بعيد.
 

Comments: