ملخص قصة التحرش بطفلة في الطالبية

23/05/2021

واقعة تحرش جديدة حصلت في منطقة الطالبية بفصيل، قام بيها ترزي وتحرش بطفلة عندها 11 سنة، طيب إيه التفاصيل؟

المتحرش هو "مصطفى.ط" وعنده 47 سنة ومتزوج وعنده 3 أبناء وبيشتغل ترزي حريمي ومقيم بالقرب من العمارة اللي حصلت فيها الواقعة.

المتحرش شاف البنت وهي بتشتري حاجات من السوبر ماركت ولقيته بيقولها "تعالي اشتريلك حاجات حلوة ونضارة جديدة ولبس أحسن من اللي إنتي لابسة" فا الطفلة خافت وجريت على عمارتها، فا مشي وراها واستنى إنها تطلع الدور الأول لإنه كان خايف ليكون موجود كاميرات في الدور الأرضي وإن واقعة متحرش المعادي تتكرر تاني معاه، وبالفعل طلع وراها في الدور الأول واتحرش بيها بالعافية بعد ما فشل إنه يضحك عليها قبل ما البنت تصرخ وهو يجري للشارع، حسب موقع جريدة المصري اليوم وموقع جريدة الوطن.

البنت طلعت البيت وقالت لباباها اللي حصل قام واخدها على القسم وعمل محضر، وبالفعل تم القبض عليه واتحبس 4 أيام على ذمة التحقيق بعد ما رصدته كاميرا وهو داخل العمارة وراها.

النيابة العامة عملت طابور عرض وجابوا كذا متهم والبنت تعرفت عليه وقالت: "هو ده اللي خوفني وقالي هجيبلك نضارة ولمس جسمي" حسب موقع الدستور.

وحسب ما قال موقع الوطن، فا المتحرش "مصطفى" سبق وتحرش بطفلة قبل كدة بس أسرتها مقدمتش بلاغ والموضوع انتهى بالتصالح.

وكمان المتحرش، قال إنه مضطرب نفسيا وبيروح يتعالج في مستشفى الطب النفسي في جامعة عين شمس، وقال إنه لقى نضارة البنت مكسورة فكان عايز يجبلها واحد جديدة ويجبلها هدوم وألعاب عشان يبسطها.

وأضاف في أقواله للنيابة حسب موقع جريدة الوطن: "أنا كنت بحميها من الكلاب وفضلت ماشي وراها عشان اتاكد إنها وصلت بيتها بأمان، بحبها زي بنتي"

Comments: