أسباب بتر قدم شريف الدسوقي.. وتفاصيل حالته الصحية  

25/05/2021

من شهرين تقريبا فيه مصدر قريب من الفنان شريف الدسوقي اتكلم عن حالته الصحية وعن تطورات رحلته العلاجية من القدم السكري وقال إنه احتمال يحتاج لبتر رجل.. ووقتها الفنان شريف الدسوقي ماقبلش الأمر خالص وعلى حسب تصريحات المصدر لأحد المواقع إنه هرب من المستشفى وقتها لما قالوله كده.

وبعدها بدأت أسرته تدور عليه بعد ما هرب من المستشفى خصوصا إن الدكتور قال إن حالته وصلت للمرحلة دي بعد إهمال كبير منه في العلاج، ولو ماعملش العملية هيكون فيه خطر على حياته، وبعد كده وافق الفنان شريف الدسوقى على قرار الدكتور.

وكتبت الفنانة بدرية طلبة على حسابها الرسمي على الفيسبوك امبارح الاثنين 24 مايو "شريف دسوقى داخل العمليات كمان ساعة. دعواتكم من فضلكم" وبعدها بشوية كتبت تاني وقالت السبب اللي دخل العمليات علشانه وقالت بالظبط كده "عن تجربة عشتها مع بابا الله يرحمه.. صعب قوي بني آدم يفوق من البنج يلاقي جزء من جسمه مبتور وخصوصا رجليه.. ربنا يصبرك يا شريف ويقوي قلبك ويتم شفائك على خير"

ومن أخر الحاجات اللي كتبها بدرية طلبة عشان تطمن الناس عليه وتوضح حالته قالت "للناس اللي بتتصل وبتبعت رسايل؛ علشان تطمن على الفنان شريف دسوقي (سبعبع)، كان فيه جرح في رجله الشمال، وهو مريض سكر، حالته ساءت جدا، وبعد الفحوصات والأشعة والتحاليل؛ قرر الدكتور بتر الرجل من تحت الركبة، وهو خرج من أوضة العمليات، وحالته مستقرة الحمد لله، ادعوله ربنا يتم شفاه على خير"

وكانت بدرية طلبة قالت في حوار ليها مع موقع "المصري اليوم" "شريف الحمد لله خرج من العمليات بخير بعد عملية جراحية لبتر قدمه، والدكاترة قالوا إنه لو ماعملش العملية كان هيموت في ظرف يومين" وقالت إن فيه شخص قعد مع شريف وقاله ده قدر ربنا، وأنت اللي أهملت من فترة طويلة"

وكتبت صفحة منسوبة للفنان على الفيسبوك "قدر الله وما شاء فعل، الحمد لله على كل شي".

الجدير بالذكر إن آخر لقاء لشريف الدسوقي مع عمرو أديب في برنامج الحكاية اللي بيتعرض على "’MBC مصر" قال فيه "أنا مش عندي صداع انا مهدد بالبتر، هو غلط اني اقول للمنتج إني ليا دفعه فلوس فيتقال اني قولت عليه نصاب؟ يعني انا اقولك عايز اتعالج تقولي ايه اخبار المصحة اللي نزلت فيها يا شريف؟ انا استحق كده يا استاذ عمرو؟ .. 

الظلم وحش انا بقول للناس عيب انا مش صغير و متربي في بيت كله عائلات ياما ضحكتوا علي شغلهم، عيب لما يتقال عليا اني بدخل اللوكيشن سكران انا بروح قبل اللوكيشن بساعتين، انا بقعد افطر مع العمال على الارض وتقدر تسألهم فرد فرد" وده كان بعد اتهامات واشاعات كتير اتوجهت له بسبب مطالبته بفلوس له من منتج عمل شارك فيه.

Comments: