بعد كشفها لجريمتين تحرش.. 3 فوائد لتركيب كاميرا مراقبة

30/05/2021

من كام يوم شوفنا قصة تحرش شخص بطفلة في منطقة الطالبية في الجيزة، وكان سبب كشفه هي كاميرا مراقبة متركبة في العمارة، والحادثة دي بتفاصيلها هي نسخة من حادثة التحرش بطفلة في المعادي، والعامل الرئيسي في كشف جرائم الاتنين المتحرشين والقبض عليهم كانت كاميرا مراقبة، ولذلك خلونا نقولكم 3 فوائد لتركيب كاميرا مراقبة في عمارتك سواء من جوا أو برا

- مجرد وجود كاميرا مراقبة ظاهرة وباينة على مدخل عمارتك أو من جواها أو في الأدوار ده هيخلي أي حد بيفكر يرتكب أي جريمة، يعني لو شخص بيخطط لأي حاجة، ده هيخليه يبعد عن المنطقة عشان ميتمش تصويره وتمنع الجريمة قبل ما تحصل.

- لو لقدر الله حصل أي حاجة في محيط بيتك، كاميرات المراقبة ممكن تساعد الشرطة والجهات الأمنية إنها توصل للمجرم، ولو عدد كبير من المحلات والعمارات مركبين كاميرات مغطية مناطق واسعة هيكون سهل تتبع المجرمين والقبض عليهم، بس مهم تكون مركب كاميرا بكواليتي عالية وفيها خاصية الرؤية الليلية عشان تكون صورتها واضحة بالإضافة إن لازم جهاز التسجيل تكون مساحته كبيرة عشان يستوعب التسجيلات اللي بتحصل طول اليوم لإنه لو مساحته مش كبيرة فا هيمسح بشكل تلقائي كل فترة.

- هتبقى مطمئن على عائلتك وممتلكاتك وأنت مش موجود في البيت، وتقدر لما تركب الكاميرا عن طريق حد متخصص، يعرفك إزاي تقدر تشوف الكاميرا وتتابعها عن طريق أبلكيشن بينزل على الموبايل بكل سهولة

Comments: