إزاي تعرف إنك هتبطل سجاير المرة دي مش زي كل مرة!

31/05/2021

لو أنت مدخن هتبقى أكيد حاولت أكتر من مرة تبطل تدخين ويا نجحت ومبروك عليك يا فشلت ولسه بتحاول ولازم تفضل تحاول خضوضا لو الموضوع مرتبط بتبطيل التدخين عشان صحتك وصحة اللي حواليك اللي بتخليهم يدخنوا تدخين سلبي.

لكن قبل ما تعرف النصايح أو تسمعها من أي حد أو تشوف طرق لتبطيل التدخين، في الأول أنت محتاج تبقى مستعد قبل ما تاخد قرار عشان مايبقاش قرار زي كل مرة كده خصوصا لإن الفشل بيكون محبط جدا وممكن يخليك ترجع تدخن أكتر من الأول.

يوم 31 مايو العالم بيحتفل بيوم الإقلاع عن التدخين العالمي.. موقع "don't change much" قال في أحد مقالاته عن 5 علامات لما يبقوا موجودين تبقى مستعد تبطل تدخين مش زي كل مرة بتقول هبطل وتبدأ وخلاص.. العلامات هي:

1- إن يكون عندك على الأقل 3 علامات واضحة لتبطيل التدخين:

قبل ما تاخد القرار وتقول هبطل السجاير وأكون إنسان جديد لازم تسأل نفسك "أنا عايز ابطل تدخين ليه؟" والسؤال ده مش أي إجابة هتبقى لايقة عليه لازم يكون عندك 3 إجابات من الإجابات الصح دي اللي هما (صحة أحسن، حياة أطول، اهتمام بصحة أصدقاءك أو أهلك، توفير فلوس، وكل ما هو متعلق بالضعف الجنسي) وفيه طبعا قايمة أطول بس بتدور الإجابات عن الصحة وصحة اللي حواليك، واعترافك بالمخاطر بيحفزك أكتر.

2- تبقى واثق إن تبطيل التدخين أفيد من التدخين:

لو مش قادر تبطل العادة السيئة دي محتاج تعترف قد إيه الحياة هتبقى أفضل من غير سجاير، اكتب في ورقة أو نوت في موبايلك إيجابيات وسلبيات التدخين، ولو كانت العيوب أكتر من المميزات فأنت كده على "التراك" الصح.

3- تعرف إنك بتتعامل مع مخاطر كل يوم:

المخاطر الصحية الناتجة عن التدخين ممكن يبقى صعب التعامل معاها بجد حتى لو مش حاسس بأي أضرار دلوقتي، فشبه مؤكد إن صحتك أو أدائك البدني بيعانوا، عشان كده بيغطوا علبة السجاير بصور بشعة زي صور السنان والأيد والرئة المسرطنة يمكن دلوقتى أنت مش حاسس بأي أمراض في الرئة لكن فرص الإصابة بيها في المستقبل أكبر لو كنت مدخن.

من الطرق اللي ممكن تخليك تبطل تدخين هي التعامل مع صحاب أو أهلك اللي بيحاولوا يبطلوا تدخين هما كمان.

4- خبرة التعامل مع التبطيل في صالحك مش ضدك:

عدد قليل من المدخنين بيبطلوا تدخين بعد أول محاولة ليهم، بلاش تبص للمحاولات اللي فشلت منك على إنها فشل، خصوصا إنك فعلا عرفت معنى إنك عايز تبطل سجاير وحاولت تتغلب عليها أكتر من مرة وبقيت خبرة خلاص في طرق التعامل مع الموضوع. 

5- هتجرب دعم اللي حواليك:

أكيد فيه كذا شخص من عيلتك وصحابك عايزينك تبطل وبيدعموا القرار ده، ودي فرصة كويسة إنك تختبر وتشوف هيدعموك وهيبقوا معاك إزاي، يعني مثلا لما هتبقى عايز تشرب سجارة وتقولهم حاجة زي كده ممكن يقولولك تخرج أو تلعبوا أو يشتتوك بأي وسيلة، وإنك تسمح لهم بالتدخل ده هيشيل من عليك عبئ كبير وهيوصلك رسالة إنك مش لوحدك ده غير إن فيه إجماع منهم إنهم عايزينك تبطل.

Comments: