١٠ أسباب بتخلي الكتب صديق مقرب لبعض الناس 

08/06/2021

أكيد كنت بتقلب في ستوري انستجرام مرة ولقيت حد منزل ستوري لواحد صاحبه على أغنية مسار إجباري "أول مرة ألاقي صاحب مايعاتبش" ومن كتر ما الأغنية كلماتها حلوة نسي إن الأغنية مسار إجباري بيغنوها للكتاب وكانت من ضمن حملة لتشجيع الناس على القراءة.

في يوم الأصدقاء المفضلين أغلبنا عنده صاحب مفضل ولو حتى الصاحب ده ماكنش زميل أو صديق مرحلة عمرية زي المدرسة أو الجامعة أو الشغل فهو هيكون بأشكال تانية زي مثلا حد من أهلك أو حد اتعرفت عليه أونلاين وعلاقتكوا ببعض عن طريق السوشيال ميديا بس أو حتى صديق عملته في دماغك وبتكلمه مع نفسك (زي ما كنا بنعمل وإحنا صغيرين) أو كتاب كمان.

لكن برضه فيه ناس حتى لو حواليها أصدقا فبيفضل الكتاب هو صاحبهم المفضل وصديقهم المقرب.. موقع "timesofindia" قال في واحد من مقالاته ليه بعض الناس بيحبوا الكتب هي تبقى صديقهم المفضل والأسباب هي:

1- الكتب مابتسألش:

الكتب عكس البني أدمين مابيسألوش وفي أغلب الوقت بيقدموا إجابة على الأسئلة اللي عندك.

2- بتخلي الشخص ينسى متاعبه:

الكتب تعتبر طريقة مثالية للبعد عن مشاكل الحياة ومتاعبها، حتة لو كنت بتمر بأاسوأ المتاعب في حياتك، فقراية الكتب بتعتبر منفذ عشان بتلهيك عن مشاكلك.

3- بتخليك أذكى:

الكتب هي أحسن مدرس، الشخص اللي بيحب يقرا عنده إجابات كتير عن المشاكل والأسئلة اللي بتدور في الدنيا، ده غير إنها بتزود معرفة الشخص وبتوسع مداركه وبتخلي عنده مفرادات وكلمات جديدة يقدر يوصف بيها نفسه ومشاعره.

4- دايما موجودين عشانك:

دايما موجودين عشانا بغض لنطر عن أي حاجة حتى لو في نص الليل هما برضه موجودين، وخصوصا بيبقوا موجودين لو الكل نام عشان الهدوء بيبقى وقتهم المثالي، والكتب برضه هي علاج الوحدة المثالي.

5- بتخلينا أشخاص أفضل:

الروايات بتخلينا نتعاطف مع الناس التاينة وبتفتح نظرتنا للعالم، وقراءة الكتب خصوصا لو كويسة بتخلينا نتعلم من خبرات الشخصيات اللي في الروايات دي وبالتالي بنكون أشحاص أفضل من غير حكم ومواعظ كتير ممكن تسمعها.

6- مش هيحكموا عليك:

الكتب بتساعدك تفهم وبتساعدك كمان تحس إنك مفهوم

7- ممكن تسافر معاهم أي مكان في العالم:

فيه كاتب اسمه " ستيفن كينج" قال إن الكتب عبارة عن سحر محمول، وإنها أسرع وسيلة تسافر بيها بالزمن والعصور ولمكان جديدة كمان.

8- الكتب بتساعدنا على الهروب:

سواء كنت في حفلة مملة أو قضيت يوم وحش في الشغل فلو قررت تقرأ كتاب هتحس إنك روحت لمغامرة جديدة ومثيرة وغيرت الطريقة اللي كنت بتفكر بيها عن يومك وعن نفسك لانها هتخرجك برا الموود ده.

9- بتغير نظرتنا للحياة:

بتدينا نظرات جديدة ومختلفة للحياة وده بيخلينا نبص للحياة بشكل أكبر وأوسع وده بيخلينا نعيش حياة أشخاص تاني غيرنا وبكده تقدر تتعاطف وتفهمهم أحسن 

10- بتعلمنا نقبل عواطفنا وإن مفيش مشاكل لو زعلنا:

الكتب بتعلم الأشخاص إن عادي لما نحس بالحزن وإننا بعد كل حاجة بشر كأنهم صحاب بجد قادر تبان على حقيقتك معاهم، وبعد كده لما تقرأ كتاب مزاجك هيروق وهتهدى.

 

Comments: