السلفادور اعتمدت البيتكوين كعملة رسمية للدولة

09/06/2021

من أيام قليلة وفي تسجيل فيديو تم عرضه في مؤتمر "بيتكوين 2021"، أعلن الرئيس السلفادوري، نجيب بقيلة، إن السلفادور هتكون أول دولة في العالم تتبنى عملة بيتكوين كعملة قانونية

وبالفعل، بقيلة بعت مشروع قانون للبرلمان عشان يتم التصويت عليه، والنهاردة تم الموافقة على قانون يعتبر البيتكوين عملة قانونية ويتم استخدامها بجانب الدولار الأمريكي وهو العملة الرسمية للسلفادور حاليا

وبقيلة قال إن القرار ده هيسهل الإجراءات على مواطنين السلفادور في الخارج وهما بيبعتوا فلوسهم.

الحوالات الخارجية بالنسبة للسلفادور مهمة جدا، لإن في 2 مليون سلفادوري عايش برا وبيبعتوا 4 مليار دولار سنويا، وده بيشكل 20% من الدخل الإجمالي للبلد

كمان القرار بيهدف لدخول المواطنين اللي هما خارج الاقتصاد القانوني للنظام المالي.. يعني إيه؟ يعني 70% من السكان ملهمش حسابات مصرفية وبيشتغلوا في الاقتصاد الغير رسمي.

الرئيس السابق، دونالد ترامب، قال إن البيتكوين عبارة عن "عملية احتيال" بتأثر على قيمة الدولار الأمريكي، وشايفها إنها عملة بتنافس الدولار وبيرغب إن الدولار يكون هو عملة العالم، وتصريحاته دي طلعت امبارح بعد كان في مشروع قانون عن اعتماد السلفادور للبيتكوين قبل ما يتم ده النهاردة بشكل رسمي.

Comments: