نصائح عشان تصور الطبيعة بشكل أفضل

14/06/2021

كل يوم بيحصل تطور في كاميرات الموبايل اللي بقت معانا كلنا، والتطور ده بقى يخليها تطلع صور أفضل وبجودة أعلى ودي بتبقى أهم حاجة في الصورة بس مش لوحدها، ومن أسهل الحاجات اللي ممكن أي إنسان يصورها هي الطبيعة زي شاطئ أو بحر أو جبال أو حقول لإنها حوالينا ومش بتكلفنا أي حاجة بس في شوية نصائح بيقولها موقع picxtrix عشان تطلع صور من الآخر!

- قاعدة الأثلاث هي أول وأهم قاعدة عشان صور أفضل في العموم، أول حاجة اظهر الخطوط اللي بتكون موجودة على الشاشة وأنت بتصور، بحيث يتشكل 9 مربعات، وحط الهدف أو الموضوع اللي عايز تصوره في تقاطع الخطوط دي.. دي قاعدة الأثلاث ببساطة.

- ركز على موضوع واحد، ده بيربطنا بالقاعدة الأولى، لما بتركز على موضوع واحد بس، وبتسيب تلتين الصورة فاضية، ده بيدي أهمية وبيبرز الحاجة اللي أنت بتصورها سواء بطة أو قطة أو كلب أو كوباية، وأهم حاجة قبل ما تصور، دوس على شاشة الموبايل عشان تعمل تركيز أو Foucs على الموضوع اللي أنت بتصوره، ده بيساعد على تحسين إضاءة الصورة وكمان عزل كويس لو بتصور من قريب، في الصورة دي التركيز بيكون على الزهور.

- من المهم إنك وأنت بتصور وبتستخدم الخطوط الموجودة في الكاميرا، إنك تأخد بالك إن الصورة تبقى معدولة بالمللي وماشية مع الخطوط، يعني مش مايلة يمين أو شمال خصوصا لو بتصور مناظر طبيعية زي البحر مثلا لإن من السهل جدا تبان وحتى لو لقطها وهي مش مظبوطة تقدر تعدلها يا إما من الجاليري نفسه أو من برامج تعديل الصور اللي هنتكلم عليها في نهاية الموضوع.

- وجود ترايبود صغير معاك للموبايل هيساعدك إنك تطلع صور أفضل من ناحية اعتدالها، ولو بتصور بشكل احترافي أكتر تقدر تعدل في كتير من خصائص الكاميرا وأنت بتصور وفي حالات هتحتاج إنك تستخدم الترايبود فيها زي إنك تقلل سرعة الغالق أو الـShutter Speed، لإن كل ما قل كل ما هتكون في حاجة لترايبود لأن أي هزة خفيفة هتبان في الصورة ومش هتطلع صح.. ده بيكون شكل المياه لما تقلل سرعة الغالق

- أحسن وقت تصور فيه الشمس هو 30 دقيقة قبل أو بعد الشروق والغرب، هنا بيكون في إضاءة خفيفة للشمس ومش هتلسع الصورة.

- صور بطريقة الـTime lapse ودي هتحتاج فيها ترايبود، لأن أي هزة في الفيديو هيفصل تركيز الشخص اللي بيتفرج، التايم لابس بيطلع فيديوهات جميلة خصوصا لو كان شروق أو غروب أو حتى حركة السحاب.

- استخدم زواية جديدة وجرب طرق مختلفة للتصوير، يعني مش مجرد تمسك موبايلك وتصور الشمس أو البحر، حاول تضيف تشوف زاوية محدش شايفها، صور كتير كتير كتير وفي الآخر شوف أفضل صورة عجبتك في النهاية.

Comments: