بعد موقف رونالدو.. إيه هي أضرار المشروبات الغازية؟!

15/06/2021

إمبارح خلال مؤتمر صحفي ضمن بطولة يورو 2020، عمل رونالدو حركة غريبة وكانت تريند على مستوى العالم، بعد ما شال إزازتين مياه غازية وحطهم على جمب، وقرب منه إزاز المياه المعدنية وقال "Água" يعني "مياه" بالبرتغالي!

وهنا السؤال بيطرح نفسه، ليه رونالدو فضل المياه عن المياه الغازية وإيه تأثيرها على جسمنا؟

حسب موقع medicalnewstoday، الصيدلي البريطاني Niraj Naik بيقول إن الكمية الكبيرة للسكر في المشروبات الغازية المفروض تخلي الشخص "يتقيأ" بمجرد دخولها للجسم ولكن وجود حمص الفوسفوريك فيها بيضعف إحساسنا بكمية السكر اللي فيها، وكمان مستويات السكر في الدم بتزيد بشكل كبير خلال 20 دقيقة وده بيعلي الإنسولين ومن ثم الكبد بيحولها لدهون!

وحسب موقع Healthline، ودراسة منشورة على موقع المكتبة الوطنية الأمريكية للطب بتقول إن الفركتوز الموجود في المياه الغازية، بيزود الدهون في منطقة البطن بشكل كبير، وده بيزيد من خطر الإصابة بمرض السكر من النوع الثاني وأمراض القلب 

ده غير إن المشروبات الغازية مفهاش أي عناصر غذائية مهمة، سواء معادن ولا ألياف ولا فيتامينات.. مجرد مياه بسكر بس ولذلك لما بتشربها أنت بتدي لنفسك مياه مع كميات عالية من السكر وسعرات حرارية ملهاش لازمة!

دراسة منشورة على موقع المكتبة الوطنية الأمريكية للطب اتعملت على 40 ألف راجل، لقوا فيها أن استهلاك مشروب غازي واحد يوميا، بترتفع عندهم خطر الإصابة بنوبة قلبية أو الموت بسببها بنسبة 20% مقارنة بالرجالة اللي بيشربوا مشروبات فيها سكر كل فين وفين! 

بيقول موقع Healthline إن شرب الصودا بيرفع من مخاطر الإصابة بالسرطان، وفي دراسة اتعملت على 60 ألف شخص بالغ، لقوا إن اللي بيشربوا 2 من المشروبات الغازية أو أكتر من 2، كانوا أكتر عرضة للإصابة بسرطان البنكرياس بنسبة 87%.

والسيدات اللي ما بين الأربعينات والخمسينات، واللي بيستهلكوا كميات عالية من الصودا، أكثر عرضة للإصابة بسرطان بطانة الرحم.

وبشكل عام، تناول المشروبات السكرية بكميات كبيرة، مرتبط بالإصابة بسرطان القولون والمستقيم.

وكمان ظهر إن في ارتباط بين استهلاك كميات كبيرة من السكر وما بين زيادة مخاطر الإصابة بالخرف أو الزهايمر، يعني كل ما مستوى السكر في الدم زاد.. كل ما بقى في نسبة أكبر للإصابة بالخرف.

يعني الصودا والسكريات بيعملوا الأتي: أمراض قلبية، السكر من النوع التاني، زيادة الوزن، السمنة، واحتمالات الإصابة بأمراض تاني زي السرطان، وكمان بتعمل حاجات تانية زي تسوس الأسنان والنقرس.. فا اشرب مياه زي رونالدو وخليك صحي!

Comments: