إيه هو تأثير ابتسامتك على غيرك؟

15/06/2021

معروف إن الابتسامة والضحك ليهم فوائد إيجابية بترجع لصحتك زي تقليل التوتر وتقوية جهاز المناعة وتحسين علاقاتك الاجتماعية.. ولكن هل ابتسامتك بتأثر على الناس اللي حواليك؟ الإجابة هي نعم.

- موقع orthodonticslimited بيقول إنك لما تبتسم لغيرك وخصوصا لو بيمر بيوم وحش، ده ممكن يديله دفعة لقدام ويحسسه بالسعادة وإنك بتظهرله اهتمامك بيه، فا هو هينقل الابتسامة دي لغيره، وغيره ينقلها لغيره، وتبقى ابتسامتك دي انتشرت بين الناس، والموقع أضاف إنه حسب عدة دراسات فا أدمغتنا بتفرز الإندروفين اللي بيخلينا نشعر بالسعادة والهدوء. 

- دراسة اتعملت عن الموضوع ده، بتقول أن لما الشخص بيبتسم للي حواليه، فا هو بيكون أكتر جاذبية للناس، وده لإن الابتسامة بتأثر على جزء في الدماغ واللي بينظم العواطف، فا الابتسامة حلوة وكمان بتخلي الناس تاخد عنك إنطباع كويس وتحبك، حسب موقع orthodonticslimited

- وحسب موقع Solara Mental Health، فا الابتسامة للناس اللي حواليك وكمان معاهم حتى لو كانوا ناس منعرفهمش، بيفرز عدد من الهرمونات في الجسم اللي بتقوي صحتنا وبتقلل مستوى التوتر وبتمنع أي أسباب للإصابة بأمراض زي السرطان والقلب.

- الشعور بالرضا، دي حاجة من الحاجات اللي بيحسها الإنسان لما شخص يبتسم له، غير طبعا حاجات تانية جميلة زي الشعور بالسعادة والهدوء والمزاج الرايق، لإنه حسب موقع Solara Mental Health، في دراسات علمية بتقول إن لما شخص بيبتسم للتاني، التاني ده بينشط عنده جزء في الدماغ والجزء ده هو اللي بيتحكم في مشاعر المكافأة، يعني الموضوع زي إنك أخدت جائزة، يعني ابتسامتك ممكن تبقى بتساوي للي حواليك جائزة حلوة وغالبا عشان كدة الهضبة قال: "بالضحكة دي قلبي متعلق".

في النهاية، الابتسامة مش بتساعدك لوحدك إنك تشعر بالسعادة وتقليل التوتر بس، لا هي كمان بتأثر على اللي حواليك وبتخلق بينكم ترابط وبتخليهم يحسوا هما كمان بالسعادة والرضا ويبتسموا لغيرهم.. وتبقى الابتسامة دي أحسن حاجة تنتشر بين الكوكب وتبقى مُعدية.

Comments: