ملخص قصة فيديو تعدي سائق توك توك على بنت في القطامية  

15/06/2021

انتشر امبارح على موقع التواصل الاجتماعي تويتر فيديو أكونت بنت نشره وكان الفيديو باين فيه إنها بتتخانق مع سواق توك توك واللي كان بيحاول يضربها كمان في الفيديو ده.

وكتبت البنت "ثريد" عن الفيديو بتاع التوك توك وقالت فيها "إمبارح تم الاعتداء عليا جسدياً وأنا طالعة من نادي القطامية جاردنز جنب نادي الصيد علي الدائري من البطئ، جيه توك توك عمال يشتم و يقول كلام مقرف و دة لبس تلبسيه يا بنت كذا وكذا و مشي قدام ووقف وأنا في عادتي بروح وبرجع النادي عن طريق النفق اللي بالضبط قدام مدرسة harmony partner" وكملت وقالت "و قصاده الناحية التانية مودرن اكاديمي فوقف هناك نزل من التوك توك قعد يشوح بايديه ويشتم وكان جاي يضرب اختي لانها كانت بتصوره.. فرحت وقفت في وشه وصديته قام ضربني بالقلم والبوكسات وكان بيقلع الشبشب ورمي عليا طوب ودة طبعا وراه صف رجالة واقفين بيتفرجوا".

وكتبت بعدها وقالت "يقولولي امشي و سيبيه ماتصوريهوش وبيدافعو عنه، اتصلت بالنجدة فوق الـ 3 مرات محدش جيه ورحت قدمت محضر عند قسم المقطم زي ما فيه ضابط اتصل بيا وقالي روحي هناك وريت له صورته والفيديو وبيقولي المحضر هيبقي مفتوح إلا لما يتجاب اسمه وأنا مش عارفة يعني أجيب اسمه إزاي وأنا بتضرب"

وبعدها بكام ساعة كتبت تويت وقالت فيها "روحت القسم مضيت على المحضر وبكره إن شاء الله بروح المحكمة بكمل إجراءات المحضر و إن شاء الله هيجيبوه لإن الموضوع انتشر جامد وشكرا جدا لكل اللي ساعدوني سواء اعرفهم أو ماعرفهمش حقيقي ربنا مش هيسيب حق حد وبتمني دايما إن أي بنت يحصل معاها كده ماتسكتش وتتكلم وتروح تاخد حقها"

وأخيراً كتبت إنه تم القبض عليه وبعدها نشر موقع القاهرة 24 خبر إن تم القبض عليه وحطت سكرينشوت من محادثة على الواتس اب  إن تم القبض على الوالد وإنه عايش في منطقة مساكن الزلزال بالمقطم.

Comments: