ملخص هاشتاج "قتلوا القطة" وتصريح من رئيس دار الأوبرا المصرية 

17/06/2021

انتشر على السوشيال ميديا من شوية هاشتاج "قتلوا القطة" من جمعية الرفق بالحيوان عشان يطالب بمحاكمة المسؤولين في دار الأوبرا المصرية، وده بعد ما انتشر مقال على السوشيال ميديا باسم "فاجعة أخلاقية وإنسانية حدثت بالأمس في دار الأوبرا، فقد قتلوا قطة مهرجان القاهرة السينمائي الأخير وننتظر ردا وعقابا"

وقالوا في المقال "فاكرين القطة المشهورة اللي اتصدرت وسائل الإعلام المحلية والعالمية في مهرجان القاهرة السينمائي الأخير، قد إيه كانت طيبة وبتحب الناس وفعلا ماسابتش واحد في المهرجان غير وسلمت عليه.. القطة دي طيبة جدا واتشهرت، وناس بيروحوا مخصوص يلعبوا معاها وجت من كام أسبوع خلفت 3 أطفال قمرات جدا وفرحانه بيهم وقاعدة بيهم على جنب والناس بتروح تأكلها في مكانها"

وقالوا كمان "تخيلوا إن إدارة الأوبرا قامت بالتخطيط لقتل القطة الجميلة دي! استغلوا جوعها وجابوا علبة تونة ووضعوا فيها السم! استغلوا جوعها هي وأولادها ..القطة البريئة وأولادها اتعذبوا عشان إنسان مريض لا يعرف دين ولا إنسانية قرر يسمهم تخيلوا!.. طيب إيه وجه الضرر من القطة لإدارة الأوبرا.. اللي أخد القرار ده مينفعش يمسك منصب في أي جهة تابعة لوزارة الثقافة"

لكن بعد انتشار الهاشتاج وانتشار القصة قال الدكتور مجدي صابر رئيس دار الأوبرا المصرية إن اللي حصل شئ غير مقبول وقال إنهم مش قتلة، وأكد إنه كلف إدارة الشؤون القانونية إنهم يتابعوا القضية ويحققوا مع العاملين في دار الأوبرا ويفرغوا الكاميرات عشان يوصلوا للي قتلوا القطة.

وأكد كمان إن دار الأوبرا المصرية مابتتعاملش مع الحيوانات بالطريقة البشعة دي، وإن بسبب مساحة دار الأوبرا الواسعة فبيبقى فيه كلاب كتير أغلب الوقت ودار الأوبرا بتجمعهم وبتنقلهم في ملجأ في صفط اللبن.

Comments: