١٠ طرق هتساعدك على زيادة إنتاجيتك في العمل

20/06/2021

الوقت الحلو بيعدي بسرعة، ولكن رغم إن وقت الشغل مش حلو خالص بس بيعدي بسرعة بردو وممكن متلحقش تخلص كل الشغل اللي وراك، فا ده بيخليك يا تكمل أكتر من الـ8 ساعات بتوعك، أو تخلص اللي تقدر تخلصه وتروح، والكل بيدور على أفضل طريقة لإدارة الوقت بشكل كويس ويقدر إنه يزيد إنتاجه في الشغل، ولذلك موقع Inc بيقولنا على 10 طرق ممكن تساعد في زيادة الانتاجية في الشغل:

- أول حاجة هنبدأ بيها هي أوقات الراحة، بعض الأبحاث بتقول إن فترات الراحة القصيرة خلال أداء المهام الطويلة بتساعد على تحسين التركيز، وإن العمل المستمر من غير أي راحة هيؤدي لانخفاض في الأداء.

- 31 ساعة في الشهر بيروحوا في الاجتماعات اللي ملهاش لازمة، حسب موقع شركة Atlassian، ولذلك ارفض حضور أي اجتماعات أنت عارف إنها هتاخد وقت وهتعطلك عن أداء مهامك اليومية.

- لو في حاجة بسيطة في الشغل محتاجة دقيقة أو دقيقتين، انجزها فورا ومتأجلهاش وحقق أحسن استفادة من كل دقيقة في شغلك، أحسن ما تركنها وترجعلها بعدين.

- باحثين في جامعة فلوريدا لقوا إن الرياضيين والموسيقيين بيشتغلوا على فترات مش بتزيد عن 90 دقيقة، وده بيخليهم أكتر إنتاجية من اللي بيشتغلوا أكتر من 90 دقيقة، ولقوا كمان إن الناس اللي أدائهم أفضل من كدة بيشتغلوا 4 ساعات ونص بس في اليوم.

- انجز الشغل اللي وراك بأحسن ما عندك، بس متضيعش وقتك في إنك تطلعها في شكل مثالي جدا لإن ده مش حقيقي ومش هيحصل، ممكن تخلص وتخش على المهمة اللي بعديها ولما يبقى عندك وقت فاضي، ارجع للحاجة اللي أنت عايز تحسن فيها وعدل فيها لحد ما تطلعها بالشكل اللي يرضيك.

- مفيش حاجة اسمها Multitasking، علماء النفس لقوا إن محاولة القيام بأكتر من مهمة في وقت واحد بيضيع الوقت والانتاجية كمان، ولذلك ركز على كل مهمة لوحدها وخلصها وبعدين ادخل على اللي بعديها.

- استفيد من الوقت الفاضي إنك تنجز شغل أكتر بدل ما تفتح السوشيال ميديا، يعني اعمل قائمة بالشغل اللي وراك ولسا مخلصش، أو طلع أفكار جديدة للشغل.

- بعض الأبحاث بتقول إن تجهيز المكتب بعناصر جمالية زي قصرية زرع صغيرة ممكن يزود الإنتاجية بنسبة 15%، وحاجات تانية زي الصور، أو إن شاء الله حتى صورة ميم أو كوميك، أي عنصر شكله حلو بالنسبالك أو ممكن يخليك تبتسم على مدار اليوم ده هيحسن إنتاجيتك بكل كبير.

- التركيز في الشغل يعني تركيز كامل، يعني تقفل أي إشعارات تجيلك سواء من الإيميل أو السوشيال ميديا أو المكالمات، خصص وقت للكلام ده يكون في نهاية اليوم أو بداية اليوم، وباقي اليوم تركيز كامل في الشغل.

- اقطع الرغي مع الزملاء الرغايين الأعزاء عشان تركز في شغلك، الأحاديث الجانبية ممكن تعمل انخفاض في إنتاجيتك.

أنا أريحلي حبتين بقى عشان أزيد من الإنتاجية بتاعتي!

Comments: