اتهامات مهند كوجاك بالتحرش بعارضي أزياء مبتدئين 

21/06/2021

بعد ظهور حملة عن فضح المتحرشين في مصر بين البنات والسيدات، السنة اللي فاتت بعض الرجالة كمان اتشجعوا وبدأوا يتكلموا عن تحرش اتعرضوله خصوصا لو من رجالة زي مثلا دكتور الأسنان اللي تم القبض عليه بعد انتشار فيديوهات لمشاهير كتير بيأكدوا إنه اتحرش بيهم، وده اللي شجع أي حد اتعرض للتحرش أو للعنف الجنسي إنه يتكلم عن الحادثة خصوصا لو من شخص مشهور عشان يصعد القضية.

وبعد ما اتكلمت طليقة تميم يونس عن تعرضها للاغتصاب الزوجي من طلقيها من أيام، امبارح يوم الأحد 20 يونيو انتشر فيديو لموديل اسمه عمر شريف حكى فيه عن تحرش مصمم الأزياء المشهور مهند كوجاك بيه وقال إنه أي موديل جديد بيظهر على انستجرام مهند بيدخل يكلمه ويبعتله وقال كمان إنه بيستغل شهرته في إنه يضحك على عارضي أزياء جداد وبيطلب منهم يبعتوا له صور بأشكال معينة.

وطبعا فيه كتير أوي منهم بيتم استغلاله في حاجة زي دي، وقال إنه كان اتكلم عن الموضوع قبلها بكذا يوم في لايف، ولإن الموضوع انتشر فقرر يقول اسم مهند كوجاك ويصعد الموضوع، وقال كمان إنه إن لو الموديل نفسه يتشهر ممكن يسمع كلام كوجاك، وقال إن من 4 سنين مهند عمل كده معاه وهو رفض وبقوا صحاب عادي واتقفل الموضوع خالص، لحد ما في يوم كان عندهم شغل وراحله البيت وطلب منه إنهم يتفرجوا على مسلسل "بورن" مع بعض فسابه ومشي.

وكمل وقال إنه ماكنش عايز يتكلم عن الموضوع ده خالص بس خاف على الشباب الجديد اللي طالع اللي أغلبه عايز يبقى مشهور ويمثل، وبعد ما خلص اللايف اللي كان من 4 أيام من غير ما يوضح اسم مصمم الأزياء، اتبعتله كميات كلام كتير عن مهند، وحس إنه مسؤول عشان كده اتكلم.

وبعد أول لايف لعمر شريف، قرر مهند كوجاك إنه يقفل الأكونت بتاعه عشان زي ما قال عمر إن محدش يقدر يجيب "سكرين شوت" لأي شات بينهم، وقفل عمر الفيديو وقال إن مهند كلمه بعد اللايف الأول اللي عمله، واتأسفله ولكن هو مابيتكلمش عن نفسه هو بيتكلم عن الناس اللي كانت بعتاله.

ومن ساعات قليلة نشر عمر فيديو كمان لتسجيل لجزء من مكالمة لرقم من أمريكا بيهدده عشان يشيل الفيديو اللي بيتهم مهند كوجاك فيه بالتحرش.

Comments: