ليه محتاج تتعلم التخلي؟.. وإزاي تمشي وتسيب الحاجات المؤلمة ليك؟

22/06/2021

لإن الحياة دايما بتتغير وفيه ناس وحاجات بتروح وتيجي فدايما الشخصية المرنة بتعرف تتأقلم مع فكرة التغيير اللي في الحياة عموما، ويمكن المرونة بتفيد الشخص في حاجات تانية في الحياة زي إنه يعرف يقبل ويعرف يتخلى.

مش معنى التخلي أو إنك تسيب الحاجة تمشي منك هو إنك تبقى شخص بياع، لكن في بعض الأحيان التمسك بالأشياء أو الأشخاص المؤلمة مبيصلحش أي حاجة، مابيعملش أي حاجة غير إنه يستنفذ طاقتك، ولو فضلت طول الوقت تتمنى إن لو الواقع يبقى مختلف برضه مفيش حاجة هتتصلح، وبيبقى الأنسب والصح في الأوقات المزعجة دي إنك تقبل الوضع الحالي والواقع زي ما هو بعدين تتخلى عنه وتمشي وتسيبه.

حتى لو أنت مش بالمرونة اللي تسمحلك إنك تتخلى عن الحاجات والأشخاص، فأنت لازم تتعلم تتخلي عن اللي بيضايقك وعن الماضي حتى لو حسيت إن ده مستحيل، بس الغريب إن ساعات المشاعر الحزينة دي أو المؤلمة بتكون مريحة وبتخلق للشخص "Comfort Zone" بيفضل عايش فيها خصوصا لو كانت المشاعر دي هي كل اللي تعرفه، وفيه بعض الناس بتعتقد إن المشاعر دي جزء من شخصيتهم وهويتهم، وبالتالي بيبقى صعب التخلي عنها.

موقع "Psychology Today" قال في أحدى مقالاته 9 خطوات لأي شخص بيعاني من عدم قدرته على التخلي عن الأشياء وعن الماضى وعن الأشخاص.. وهما:

1- لازم تقبل الشخص اللي أنت عليه دلوقتي والطريقة اللي الناس بتتعامل معاك بيها، ومع مرور الوقت هتدرك إن مش كل حاجة بتمشي زي ما كان متخطط لها، عموما لو بقيت مدرك نفسك وجزء من علاقاتك فأنت هتتحسن مع الوقت وعلاقاتك كمان هتتحسن، بس أهم حاجة قدر نفسك زي ما هي.

2- بلاش تتوقع أي حاجة، لإن التوقعات بتودي لخيبة الأمل في الآخر، ومافيش أي ضمانات في الحياة إن خططك وتوقعاتك تمشي زي ما هي، ومفيش حاجة ممكن نعملها عشان ناخد النتايج اللي نفسنا فيها لما نتعامل مع الناس، وعشان تتخلى عن توقعاتك دي فأنت محتاج تتعامل مع الواقع بشكل منطقي ومناسب.

3- خليك واثق إنك هتقدر تتخلى عن اللي عايز تتخلى عنه، لإن إيمانك بأهدافك بيخليها تتحق فخليك واثق من نفسك.

4- خليك عارف إنك مش ممكن تغير شخص تاني فماتضايعش وقتك ولا طاقتك، لإن الاعتقاد بتاع "I can fix him" ده هو اللي بيخلي الناس يضيعوا وقتهم مع بعض أو يحاولوا يرضوا بعض ويقدموا حاجات كتير في اعتقاد منهم إن ده هيغير الطرف التاني وللأسف بتطلع خطة فاشلة.

5- خلى اللي الناس يفتكره عنك يفتكروه، وابدأ حدد أولويات اللي بتحس بيه لنفسك 

6- بطل تعيش في خانة الذكريات وبطل تتمنى إن الحاجات القديمة ترجع تاني، عيش في الحاضر لإنك عايش في اللحظة دي ومش هتعرف ترجع بالزمن تظبط الماضى على كيفك ولا تشوف المستقبل مخبيلك إيه.

7- الخوف بيمنعنا إننا نعمل حاجات كتير زي إنه بيقفل عقلنا قدام احتمالات المستقبل الواقعية، ومعظم المخاوف بتبقى مليانة بكلمة "ماذا لو"، اعمل اللي أنت خايف منه لو هتتخلى عن حاجة بتحبها وشايف إنك ماتقدرش تعيش من غيرها، هتنجح وهتكبر.

8- احترم الخسارة اللي خسرتها وبلاش تتجاهل مشاعرك السلبية بسبب الحاجة اللي فقدتها "اللي المفروض هتتخطها أو هتتخطى خسارتها" لإن محاولة تجاهل مشاعرك السلبية هيزود معاناتك، خصوصا لإن من الصعب تجربة الخسارة ومفيش مشاكل إنك تسيب نفسك تحزن وتضايق وتتألم، وخد وقتك في الزعل لحد ما تقدر تقف وتقول إنك هتتخطى الخسارة دي وهتتخلى عنها.

9- اتعلم تسامح، لإن عدم رغبتك في التسامح هيحبسك في الماضي وهيمنعك من إنك تتقدم في حياتك، وخليك فاكر لما تسامح فأنت بتعمل كده عشان نفسك مش عشان الناس التانية، وحتى لو مافيش سبب تاني غير كده فسامح برضه وامشي واتخلى لإنه الأفضل ليك.

Comments: