بعد القبض عليه وحبسه على ذمة التحقيق.. ملخص قصة مدرس بالقليوبية المتحرش

24/06/2021

انتشر امبارح يوم الأربع 23 يونيو 2021 هاشتاج على تويتر "المدرس المتحرش" والهاشتاج كان عن مدرس في مدرسة تجريبية في بنها تحرش ببعض الطالبات اللي كان بيدرسلهم، وعلى حسب ما قالوا إنه كان بيحضنهم بشكل غير طبيعي وطلبوا منه يبطل بس ماسمعش كلامهم وقالوا كمان إنه كان بيلمسهم.

وبسبب خوف الطالبات منه ماحدش فيهم كان بيتكلم، لحد ما طالبة حكيت لوالدتها اللي قدمت بلاغ في المدرس، وكانت لطلبة كتبت بوست على الفيسبوك قالت فيه إنها اتعرضت للتحرش من مدرس اللغة الإنجليزية بتاعها في مدرستها في بنها، وبعدها قسم تاني بنها تلقى 3 بلاغات من 3 طالبات بيتهموا فيه المدرس بالتحرش.

وبعدها كشف الدكتور ياسر محمود وكيل وزارة التربية والتعليم في محافظة القليوبية، يوم الأربع بليل إن هيتم تشكيل لجنة لتقصي الحقائق في واقعة اتهام مدرس بالتحرش بالطالبات في المدرسة التجريبية في بنها.

ووضح وكيل وزارة التربية والتعليم إنه نظراً لعدم وجود طالبات في المدرسة، بسبب الإجازة هيتم سؤال بعض العاملين في المدرسة بشأن الاتهامات أثناء الدرسة، أو في سنتر الدروس الخصوصية.

وأعلنت الداخلية في نهاية اليوم ضبط المدرس المتحرش ببعض الطالبات في مدرسة بالقليوبية، ونشرت بعض المواقع النهاردة الصبح الخميس كلام المدرس في التحقيقات واللي نفى فيه التهم دي وقال إنه بيعامل التلاميذ من الجنسين زي أبوهم، وقال إنه كان بيحضنهم خلال حصة الدرس كنوع من التشجيع على التفوق في الدراسة، وقال أن تصرفاته كانت بتحصل بشكل عفوي وتلقائي وإنه ماقصدش التحرش بيهم.

وأضاف كمان في تحقيقات النيابة العامة اللي انتهت بحبسه على ذمة التحقيق في القضية، إنه مدرس لغة إنجليزية وكل طلابه صغيرين لإنهم من مراحل ابتدائي وإعدادي، وقال إنه كان بيديهم دروس في مجموعات علنية، وكانت معاملته للطلاب بتتم بشكل علني أمام الكل عشان كده تصرفاته كانت طبيعية على حد تعبيره.

واستمعت النيابة لشهادة عدد من أولياء أمور الطالبات والطلاب، اللي قالوا إن المدرس تعمد التحرش وهتك عرض بتاتهم عن طريق لمس مواضع حساسة من أجسامهم واحتضانهن من الخلف، وأكدوا على إن تصرفات المدرس كانت سيئة.

واستمعت النيابة كمان لعدد من الفتيات في المرحلة الإعدادية، اللي أكدوا إن المدرس اتحرش بيهم وكان بيحضنه بشكل غير طبيعي، وقالوا إنهم قرروا يقولوا لأهلهم عشان يبطل أفعاله دي وياخد عقابه بالقانون، وأكدوا إن الأفعال دي كانت أثناء وقت الدرس الخصوصي، وإنه مابيعملش التصرفات دي معاهم في وقت الدراسة.

Comments: