بلاي ليست للمهزأين وعشاق الاختيارات الغلط!

29/06/2021

البلاي ليست دي للمهزأين اللي بيرجعوا للاكس مرة واتنين.. واللي بيفكروا يرجعوا.. واللي قرروا يشيلوا البلوك، أو اللي شايفين الخازوق ورايحينله برجليهم

1- بحبه مهما اشوف منه - "محمد عبد الوهاب"

بحبه مهما اشوف منه ومهما الناس قالت عنه.. ده إنت ولعت في الريد فلاجز كده يا أستاذ عبد الوهاب
 

2- عيون القلب - "نجاة"
 

وأنا رمشي ما داق النوم وهو عيونه تشبع نوم.. وبعدين بتأكد تاني عالموضوع في إنه بيقول يمشي وهي تسهر ماتنامشي ياللي مابتسهرش ليلة يا حبيبها.. طب ليه يا ست الكل كده هو مداينك 

3- يا أهلًا - "تامر عاشور"
 

أنا قولتله ييجي واديتله امارة.. ليه بيحسبها ومستصعبها ده أنا هرجع بأشارة.. وده التعريف الحي لكرامة مين دي أنا لسه ماسحة

4- مابتعلمش - "أنغام"

 

هو اسم الاغنية لوحده كفاية.. هنا  أنغام معترفة إنها بتكرر نفس الاخطاء بس باحترافية أكبر

5- أكتر من كده إيه - "إيهاب توفيق"

هنا الراجل قايدلها صوابعه العشرة شمع.. وبيقول طب اكتر من كده إيه؟ اولعلك في نفسي عشان ترتاحي؟

6- اتقي ربنا فيا - "آمال ماهر"

هنا آمال ماهر بتقول شايلاك سنين في عيني ومطلع انت عيني وقت الشدة تلاقيني بعمل بأصلي معاك، واضح إنه كان بيبيعها دهبها ويمضيها كمبيالات بس كل ده ممنعهاش تسيبه وكل اللي قالتهوله "اتقي الله"

7- يا بتاع النعناع - "مصطفى حجاج"

الأغنية دي بالذات ثعبانية شوية لأنها تبدو فرفوشة وبترقص.. بس لو ركزت في الكلام، هنلاقي جملة " اللي سايب قلبي يولع وبعذاب قلبي بيتمتع"  فهنكتشف هنا أنها علاقة سادية وباقي الكوبليهات بتأكد الموضوع ده 

8- أحبك أكرهك - "عمرو دياب"

احبك اكرهك.. اسيبك اندهك.. اعلق نفسي بيكي ولا اعمل فيكي ايه.. ودي الاغنية اللي بتثبت فعلا ان في ناس بتحب تروح للخازوق برجليها وما تقدرش تستغنى عنه

9- أكرهها وأشتهي وصلها - "كاظم الساهر"

وهنا كاظم بيقول إنه بيكرهها وإنها ست كدابة ومش تمام.. بس في نفس الوقت بيشتهي وصلها وإنه بيحب اللؤم في عينها.. بس خلاص طالما وصلت للمرحلة دي ماتكملش

10- آخر أغنية معانا هي رائعة فيلم الباشا تلميذ "قطعني حتة حتة"

قطعني حتة حتة.. وارميني لأي قطة.. أنا كنت بحب ستة دلوقتي بحبك أنت.. ودي تقريبًا بتلخص وتعبر عن حالة الشخص المهزأ ورؤيته لشكل العلاقة.. واعترافه بإنه بيحب الموضوع أوي!

Comments: