فقدان الذاكرة التقدمي.. بيخليك تبطل تخزن معلومات جديدة

05/07/2021

دايما بنشوف في الأفلام إن الشخص اللي بيفقد الذاكرة، يعني فقد كل المعلومات اللي يعرفها عن نفسه وعن اللي حواليه قبل الحادث اللي تسببله في فقدان الذاكرة، ولكن هل ممكن الشخص يبطل يخزن معلومات ويبقى فقدان ذاكرة تقدمي أو متقدم؟ أه وده اللي اسمه "فقدان الذاكرة المتقدم أو التقدمي" أو Anterograde Amnesia

الموضوع شبه فيلم "فاصل ونعود" لما كان كريم عبد العزيز بينسى أي شخص جديد يقابله أو أي معلومة تتقاله.

حسب موقع Mayo Clinic، المصابين بفقدان الذاكرة التقدمي، مبيعرفوش يحتفظوا بأي معلومات جديدة ولكن المعلومات القديمة بتفضل موجودة في الذاكرة على الأرجح، يعني يقدر يفتكر حاجات حصلت في الطفولة أو اسم مديره اللي بيكرهوا أو اسم الإكس.. ولكن ممكن ينسى إنه شرب نسكافية الصبح! 

وحسب موقع مايو كلينك، في أعراض ومؤشرات على القصة دي زي خلق ذكريات كاذبة ودي بتنقسم لذكريات المصاب اختراعها كلها أو في جزء منها حقيقي، بالإضافة لأعراض تانية زي الارتباك وعدم التركيز.

ده بيحصل بسبب تلف في أبنية الدماغ اللي بتشكل الجهاز الحوفي واللي بيتحكم في الذكريات والانفعالات، وده بيكون في مكان عميق داخل مركز الدماغ، وللأسف مفيش علاج محدد للحالات دي ولكن بيكون فيه ممارسات معينة بتتعمل زي تدريب الذاكرة واستخدام المفكرات وتطبيقات التذكير على الموبايل ومكملات زي فيتامين ب 1 وده في حالة نقصه في الجسم.

وفي عوامل بتزيد من خطر الإصابة بأي شكل من أشكال فقدان الذاكرة في حالة نقص فيتامين ب 1، حادث عربية، تعاطي الكحول، سكتة دماغيةـ جراحة في الدماغ أو وجود إصابة أو أورام في الدماغ، العلاج بالصدمات الكهربائية.

موقع Mayo Clinic بينصح بكام خطوة عشان تقلل فرصة إصابة الدماغ لأن ده بيكون سبب جذري في فقدان الذاكرة، زي تجنب الافراط في شرب الكحوليات، وارتداء خوذة للعجلة أو الموتسيكل ووضع حزام الأمان خلال قيادة العربيات، بالإضافة لعلاج أي عدوى تحصلك عشان ميكونش في فرصة لانتشارها في الدماغ وزور دكتور لو حسيت بأعراض تشير لإصابتك بسكتة دماغية أو تمدد في الأوعية الدموية الدماغية زي الصداع الشديد أو الإحساس بالتنميل أو الشلل من جانب واحد.

Comments: