نشرة جلوكال الصباحية: 5 حاجات تفتح نفسك ع اليوم

صباح الخير..

عاملين إيه؟! يارب تكونوا بخير.. أزيكم في نشرة جلوكال الصباحية، ودي فقرة هنحاول نثبتها كل يوم الصبح هتبقى تجميعة لطيفة ظريفة من أخبار لايت أحيانًا وهايفة أحيانًا أخرى ومحتوى عمومًا رايق تصطبحوا به كدة بدري وتبدأوا به اليوم قبل زحمته ومشغولياته ومش هنطول عليكم ونبدأ بأول خبر..

1- جزمة حبنا:

النجمة Ariana Grande نشرت الصورة دي مع جوزها Dalton Gomez وهم بيقضوا شهر العسل في مدينة أمستردام وقاعدين جوا جزمة كبيرة أو صندل تقريبًا أو احتمال ده قبقاب أفرنجي؟! بصوا ما علينا يعني.. يلا عقبال ما تلاقوا شريك الحياة اللي تقعدوا سوا يومًا ما في لامؤخذة جزمة واحدة، ولو لاقيتوه خلاص يبقى عقبال ما تعرفوا تسافروا وتتصوروا في الجزمة الصفرا الهبلة الجميلة دي!

2- طلع الطفل اللي جواك:

بمناسبة الفسح والخروجات وأجازة الصيف بقى تعرف إن  قناة WB KIDS على اليوتيوب بتنزل فيديوهات كتير لكارتونات كلاسيكية زي توم وجيري وكارتونات لوني تونز إلخ، فعاملين بلاي ليست لطيفة اسمها Summer Fun وهي حلقات ومقاطع كارتون بتدور أحداثها في الصيف، ممكن تقعد تتفرج عليها وأنت بتفطر أو بتاكل عمومًا أو زهقان من الشغل ومشغل يوتيوب في الخباثة من ورا المدير وده اللينك بتاعها، نتمنى تعجبكم

3- ساندوتش فراخ بالمايونيز ع الفطار:

بمناسبة الأكل والفطار جربت قبل كدة ساندوتش الفراخ بالمايونيز؟! لو مجربتهوش فدي وصفة النهاردة لساندوتش فطار مختلف أو ممكن تاكله كتصبيرة على الضهر كدة وكل اللي محتاجه عشان تعمله هو الآتي (صدر فرخة تقطعه وتشوحه ع النار وعليه بهارات وحركات بتحبها وبعدين عقبال ما الفراخ تستوي تعمل خلطة المايونيز في طبق غويط وهي مايونيز وحبة بصل متقطعين وبقدونس وفلفل أسود، حط الفراخ عليهم وقلب كله مع بعضه وحطهم في توست محمص وبالهنا والشفا) عارف إننا كروتنا الوصفة بسرعة بس أنتوا شطار وفهمتوا من الصور يعني الخلاصة، الساندوتش شكله يجوع فعلاً، هنقوم نعمل واحد ونكمل الباقي الأخبار..

4- الطبيعة الأم:

بنرشح لكم المرة دي أكونت جميل على إنستجرام اسمه earth يعني "الأرض" اسم عادي جدًا بس عليه صور مختلفة لكوكب الأرض ومناظر طبيعية متصورة بشكل مميز جدًا لو قعدت تتفرج على الصور اللي عليه 5 دقايق هيفتح نفسك ع الدنيا كلها الصراحة، خد لفة فيه وادعيلنا.

5- القط الغاضب:

وأخيرًا هنسيبكم مع القط ده اللي صحابه أخدوه يفسحوه على شاطيء البحر بس واضح من صوره إنه لا طايق البحر ولا الشاطيء ولا صحابه أساسًا، صوره بتتكلم عن نفسها!

Comments: