٩ طرق هتخليك تاكل بره البيت بأقل الخساير لو عامل دايت

26/05/2019

من ساعة ما سمينا الرجيم دايت، وإحنا بوظنا وكلبظنا، وفكرة الدايت أبو خضار مسلوق وربع بيضة وتمن رغيف أثبتت فشلها، وبنرجع ناكل زي البني آدمين الطبيعيين علشان أكل الأرانب مابينفعش. وإحنا طبيعة شغلنا ونومنا وأكلنا بتخلينا نتخن كتير. الموضوع ده فيه شوية طرق بسيطة تقدر تساعدنا إننا ما نعكش وما نزدش في الوزن كتير، لو متعودين ناكل برا كتير.

١. اطلب الأكل مشوى بدل مقلي

كلنا عارفين إن الأكل المقلي بيدمر أي دايت، لكن الأكل المقلي برا البيت بيبقى شارب زيت أكتر من المعتاد، علشان كميات الزيت اللي بيتقلي فيها الاكل أكتر، ومش بيهتموا بتصفيته بعد ما بيطلعوه من الزيت، حاولوا على قد ما تقدروا تاكلوا مشوي علشان كمية الدهون اللي في الزيت.

٢. قللوا المايونيز

المايونيز فيه سعرات حرارية عالية، علشان كمية الزيت اللي بيتحط فيه، المايونيز ممكن يكون جنب الطبق الرئيسي بس بكمية محدودة، ما تخليهوش في السلطات كمان، وبلاش طفاسة، ممكن تبدلوه بسلطة زبادي فيها فايدة أكتر، معلقة صغيرة من المايونيز فيها ٩٠ سعر حراري مقابل ١٣ سعر موجودة في الزبادي، هتلاقي فى مينيو السلطات عند أى مطعم مشويات سلطة زبادي، المايونيز مش موجود بس كغموس، لكن بيضحكوا عليك وبيحطوه في سلطات كتيرة. 

٣. اطلب السلطة الأول

السلطة لو كانت سلطة خضرا أو تبولة أو حمص هيبقى فيها كمية ألياف هتشبعك قبل ما تواجه الوحش في الطبق الرئيسي، هتلاقي نفسك أكلت كميات أقل بعد ما  تكون بدأت بالسلطة، بس إحنا مش بنقصد هنا السلطة بالكولسلو والتومية (مش عايزين صياعة). واللذيذ في الموضوع إن فيه مطاعم فاست فود بتقدم سلطات.

٤.  استغنى عن الـAppetizer

فيه مطاعم زي spectra, cortigiano, steak out بيقدموا bread basket، طبق العيش، على إنه appetizer، ده حاجة استغفر الله العظيم كده عيش ومخبوزات جامدة فشخ بتتغمس في صوصات مختلفة، دي بتتعمل علشان يربطوا بيها الزبون، أول ما تقعد قول للـ waiter أنا مش عايز bread basket.

٥. اشرب مياه وسط الأكل

اللي يقولك المياه وسط الأكل بتعمل كرش اعرف إنه مش فاهم، المياه وسط الأكل بتنزل معدتك وتبعت رسالة للمخ تقوله "أنا استكفيت"، المياه ملناش غنى عنها.

٦. عن العيش السورى The guilty pleasure

العيش السوري، تاني أهم اختراع بعد البطاطس المحمرة، العيش السوري ظهر قبل بداية الغزو السوري من سنتين، ظهر من حوالي ١٠ سنين، وكان التطور الفشيخ للعيش الشامي، عامة لما تاكل في مطعم سوري، اطلب إن العيش ما يتحطش عليه طبقة زيت، الزيت اللي بيتحط عليه مع الحرارة بيبقى فيه سعرات حرارية بالعبيط وإحنا مش ناقصين.

٧. شيل جلد الفراخ

الجلدة اللي بتستر الفرخة دي هي أكتر حتة sexy فيها، معلش تعالى على نفسك شوية، لأن جلد الفراخ هى أكتر حتة فيها دهون مشبعة، حتى المطاعم اللي بتقدم فراخ مشوية زي "أم حسن" بتحط نسبة دهون بزيادة زي الزيت أو السمنة قبل الشوي، وتخيل معايا إن جلد الفراخ ده أكتر حتة بتتركز فيها الهرمونات اللي بتتحقن للفراخ البيضا.

٨. الحلويات

هو الموضوع صعب، بس الحلويات ممنوعة منعا باتا من كل الأوساط المهتمة بالدايت، بس ممكن نعمل حركة صايعة، لو خارجين كلنا ممكن نقسم حتة الـ cinnabon على أربعة، وبلاش نطلب عليها صوصات، لأن السينابون الواحدة فيها ٨٨٠ سعر حراري، فكده ممكن نكون نزلناها لـ ٢٢٠ سعر حراري (مش وحشين برضه)، ممكن كمان نحلى بـ fruit salad، أو أي حاجة فيها dark chocolate.

٩. روح مطعم انت روحته قبل كده

لما تخرج تاكل بره، روح مطعم جربته قبل كده، علشان عادة بتبقى عارف الـ menu، وما تحسش إنك اتغيرت عن قبل الدايت كتير، لو روحت مطعم جديد هيبقى نفسك تجرب حاجات كتيرة جديدة، وطبعا معظمها هيبقى دسم ومش هتعرف عدد السعرات الحرارية اللي فيه.

Comments: