8 حاجات هتساعدك تحارب الزهق في الشغل
أوقات كتير بنلاقي نفسنا زهقنا فجأة وفقدنا الشغف واحنا قاعدين في الشغل ومش قادرين نكمل ولا نعمل حاجة جديدة وبنحس إن إنتاجيتنا قلت عن المعتاد كمان .. خاصة لو شغلنا بيحتاج مجهود ذهني وتفكير عشان كده في الموضوع ده هنقولك تعمل إيه عشان ماتحسش إنك زهقان وملان في الشغل وفقا لموقع indeed
1- خد فترة راحة:
أحيانا بيكون عندنا ملل وزهق بسبب إننا مبناخدش بريك وسط الشغل حتى لو لدقايق صغيرة نريح فيها دماغنا ومانفكرش في حاجة
حاول تقوم تتمشى شوية في المكتب حتى وده هيساعدك تغير المود وتفصل شوية..
2-حاول تحط أهداف جديدة لنفسك:
لما تفكر أنت عايز توصل لإيه وليه انت جاي الشغل ده عشان خطوة في دماغك بعدها وتطور في شغلك ده بيشجعك تكون عايز تشتغل أكتر عشان تقدر تحقق ذاتك
3-حاول تبص على الجانب الإيجابي:
فكر أنت ليه بتشتغل الشغل ده؟ اكيد هتلاقي إن في حاجة بتحبها فيها هى اللي خلتك تختاره أو النفع اللي بيعود بسبب مهنتك عالمجتمع والناس وإزاي بسبب شغلك بيحصل أثر إيجابي..
4-حاول تتعلم حاجة جديدة:
ممكن تحاول تتعلم حاجة جديدة تساعدك يبقى أدائك أحسن في الشغل وبالتالي ده هيخليك متشجع أكتر إنك تشتغل وهيطورك كمان ويخليك تكتسب خبرات مهنية جديدة
5-حاول تفضي إيميلك وجهاز الشغل:
من وقت للتاني حاول تمسح الحاجات القديمة الخاصة بالشغل ومابقتش تستخدمها وفضي مساحة لان ده هيحسسك براحة وإنك أنجزت حاجات كتير وكمان هتحس إن مفيش ضغوطات عليك وهتقدر توصل للحاجات اللي محتاجها بطريقة أسرع وهيوفر وقتك في اللف على الحاجات المهمة.
6-حاول تستفاد من ناس في مجالك:
ممكن تاخد رأي الناس الشاطرة في مجالك عن إزاي بينظموا وقتهم وبيخرجوا من أوقات الملل لأن ده هيخليك تتعلم وتستفاد منهم وكمان هيخليك تجدد طاقتك واهتمامك بشغلك وتفتكر إيه اللي بيميزه.
7-أتكلم مع مديرك واطلب منه النصيحة:
ممكن يديدك نصايح أو يساعدك تتعامل إزاي مع وقت الملل أو حتى يديك شغل يناسب اهتماماتك أكتر عشان تكون متحمس ليه
8- دور على شغل جديد:
لو عملت كل الحاجات اللي فاتت دي وبرضه فضلت زهقان وملان من الشغل يبقى دور على وظيفة مناسبة أكتر ليك سواء في نفس المكان اللي بتشتغل فيه او مكان تاني .
في الأخر لازم تعرف إن الشغل بيمثل جزء كبير من حياتك وبتقضي فيه عدد ساعات أكتر يمكن من اللي بتقضيها مع عيلتك وصحابك فلازم يكون مكان مريح ليك نفسيا و تكون أنت كمان بتساعد نفسك تكون بتشتغل بذكاء من غير ماتحس بإرهاق..
ولو عايز تعرف إزاي تشتغل بذكاء وماتضيعش وقت تقدر تشوف المقالة من اللينك ده..
