5 أسباب بتخلي الناس تبرد في الصيف

طبيعي جدا كل الناس تحس بالبرد في الشتاء أو ساعات في الصيف برضه لو قاعدين في أماكن التكييفات فيها عالية أوي.. لكن لو بتحس بالبرد طول الوقت وأنت السبب في خناقات التكييف طول الصيف فدي علامة إن جسمك تعبان خصوصًا إن فيه ناس بتقدر تستحمل درجة الحرارة لما توصل لـ 10 وناس تانية بمجرد ما درجة الحرارة تقل عن الـ 20 بتلبس شتوي خلاص وقوة تحمل البرد مالهاش علاقة بالنوع سواء راجل أو ست كمان.

فلو أنت من الناس اللي بتسقع في الصيف فأنت لازم تزور دكتور لإن دي علامة عن تعب في جسمك أنت مش واخد بالك منه.. وخلينا نقولك شوية أسباب للبرد اللي بتحس بيه ده حسب ما قال موقع “timesofindia”:

1- الأنيميا:

نقص خلايا الدم الحمراء في الجسم أو المعروف باسم الأنيميا ساعات بيبقي سبب أساسي للإحساس بالبرد دايما وده لإن خلايا الدم الحمراء هي المسؤولة عن إنها تودي الأكسجين في كل أنحاء الجسم، ولو لأي سبب جسمك مانتجش كمية كفاية منها فهتحس بالبرد أكتر من غيرك، والسبب الأهم في نقص خلايا الدم الحمراء في الجسم هو إن الشخص مابياخدش كمية كفاية من الحديد عشان ينتج خلايا دم حمراء وده اللي بيحصل بسبب سوء النظام الغذائي أو التهاب الأمعاء أو الحمل أو فقد الدم، وبسببه بتقل الدورة الدموية من أطراف الجسم فبيحس ببرودة أكتر.

2- قصور في نشاط الغدة الدرقية: 

وهي حالة الجسم مابينتجش فيها كمية كفاية من هرمونات الغدة الدرقية، وهي الهرمونات المسؤولة عن تنظيم الحرق، وبسبب قلة هرمونات الغدة الدرقية الجسم بيلاقي صعوبة في تنظيم درجة الحرارة الداخلية فالشخص بيحس بالبرد أكتر، والأعراض التانية للغدة الدرقية هي النسيان والاكتئاب وجفاف الجلد والتعب وزيادة الوزن.

3- عايز تنام:

النوم كمان له دور أساسي في تنظيم درجة حرارة الجسم، وممكن قلة النوم تتعارض مع الساعة البيولوجية للجسم وتبدأ تحسس الشخص بالبرد، لإن جسمنا بيتبع دورة مدتها 24 ساعة والتغيير البسيط فيها ممكن يعطل عملها الطبيعي عشان كده لو حاسس بالبرد طول الوقت فحاول تنام كويس.

4- خسيت أوي وقتها:

الجسم بيستخدم الدهون عشان يحافظ على درجة حرارته الداخلية عشان يحسسنا بالدفى فلو كنت خسيت أو فقدت وزن في الفترة الأخيرة فدخه معناه إنك فقدت دهون وبالتالي دي سبب ممكن يحسسك بالبرد، ولكن ده مش شئ أساسي عند كل الناس بس لما الشخص بيتبع نظام غذائي سعراته الحرارية قليلة ده بيسبب بطئ في عملية الحرق والجسد بيلاقي صعوبة في تنظيم درجة الحرارة، فالأشخاص اللي بيعانوا من أي نوع من اضطرابات الأكل بيحسوا بالبرد برضه لنفس السبب.

5- بتعاني من مرض الـ “رينود”:

مرض “رينود” هو عبارة عن اضطراب نادر في الأوعية الدموية بيتسبب في ضيق الأوعية الدموية لما درجة الحرارة بتقل وده بيخلي الشخص يحس بالبرد، وفي بعض الأوقات بيتحول لون رجل الشخص ودراعة للون الأزرق بسبب إن الدورة الدموية في الجسم مش سليمة والسبب في الحالة دي مش الجو بس ساعات بيكون المجهود الزيادة برضه.. وعلاج المرض النادر ده هو تغييرات في  نمط الحياة.